Penjelasan Khotbah Matius 25:1-13

Mateus 25:1-13

Patujolo

Di jolo ni bindu on ditsringoti, halelengse ni hasiangan on dohot taringot tu harorona na so adong umbotos, gabe torop na sai lalap di hataboon portibi, marmangani dohot marpestai. So dipardulihon pangaradeon tu haroro ni ari parpudi i. Na deba, rap di sada ulaon do nasida, alai ndang rap parsidohot di haroro ni anak ni jolma i.

Tudosan ni i ma jamita na di Bindu 25:1-13 on. Bilangan 1 dohot pandohan 5 na oto, 5 na pantas marroha, ndang mandok prosentase i. Jadi ndang mandok satonga ma na rade, satonga ndag diloas be masuk tu pesta i. Dung i, unang pola soal palito dohot miak na gabe patorangtorangonta, alai naeng fokus tu harohaon ni jolma dohot pangaradeonna tu haroro ni Tuhan i do. Siala ni i taparrohaon ma denggan.

Isi ni turpuk

1)      Na sedang manomunomu pangoli do nasida na masiboan palitana be. Boasa palito boanon, aut boha ndang di arian harorona, ala so dipabotohon detik menit haroro ni pangoli i. Holan i, nunga dipabotohon, na ro do pangoli i. Ala ni mansai ringkot parsitutuon paimahonsa, tarmasuk ma parade palito aut boha sahat tu borngin. Hape di pangaradeon on, atik pe nunga ditàgam boi sahat tu borngin do harorona i, ndang hibul rohana di pangaradeonna be. Ai so sude masiboan miakna be. Jala ndang marsipaingitan huroha. Dung i na so mamboan miak on, ndang tangkas binoto, boasa so diboan miakna. Tagamon naung dietong boi galak otomatis palito i so marmiak? Songon palito Aladin. Ai godang ajaran nuaeng "tumbuh sendiri", "masiboan rejekina be". Manang manghirim, sian dongan ma annon jinalo, sai adong do i na lobi miakna, manang sai adong do dongan i na olo i mambagi miakna. Jadi mangasahon donganna ibana di pangaradeonna. Boi muse do, ra, di rohana be, ndang pola leleng paimaon i, jadi ndang pola ringkot paradeon miak, sae ma holan na di palito i sajo. On ma na spekulatif.

2)      Leleng do harorona. Gabe tarpodom. On do ancaman na balga di na paimaimahon, bosan, loja, ndang adong siulaon (aktivitas) ujungna gabe modom. Di na modom, so adong binoto be na masa. Di na tarpodom so binoto be na hurangniba. Di na modom so binoto muse be sadirhari pardugoniba, lumobi so adong na boi paradeon be dis. Memang, na modom ringkot do, alai andorang so modom nunga paradeon angka na ringkot nang tu oarpodomon i sandiri dohot na ringkot dung sae modom, asa di na tarsunggul nunga rade sude gka na ringkot muse pangkeon. Tingki na paimahon i, ndang diiisi angka na oto i, gabe rap modom dohot angka na pantas marroha i naung singkop pangaradeonna i

3)      Sian na so panagaman, di tonga borngin, adong ma joujou di na modom i nasida mandok asa hehe. Dihalaputi ma parpalitoanna be, na gabe tanda ni haradeonna be tu hasampuran rea (perjamuan kawin). Tarsonggot ma na so mamboan miakna. Ai naeng mangido sian donganna, hape dongan na pantas marroha i holan na patut pangkeonna do diboan. Ndang so parduli nian nasida tu donganna, alai adong partingkian na so mungkin be marbagi, ai gabe ndang di hami dohot di hamuna. Gabe so marlapatan be, ai ndang boi tolhas tu hasampuran rea i. Solusi kritis do dilehon dongan na pantas marroha i, asa laho nasida manuhor miak. Memang angka na pantas marroha i, sai bou do pe mangalehon kemungkinan na boi ulaon ni donganna. Alai ndang sude be boi berhasil, ala persoalan tingki. Adong do dapotnasida miak, alai nunga tarlambat.

4)      Laos i do na so siat tu roha, ndang na so boi paradeonna be hian hape miakna nian, na so diparade. Alai sahat tu na mandonok haroro ni pangoli i, so adong diparade be dirina. Leeleng do tingki paimahon i, alai ndang dipangke denggam. Dung sahat tingkina i, di na ro pangoli i, hira na humalaput. Tutu do hape. Saut do hape harorona i, nina rohana. "Ondihon ahu dongan jolma", ninna tu donganna, hape nang boi be. Huparade ma jo miakku, nina hina ra humalaput. Hape nunga sordak pintu hasampuran rea. Marisuang sudena, gogona, tingkina, halojaonna di na paimahon i, ai so saut boi dohot tu hasampuran rea i. Diggo pr manjouhon: "Tuannami, ungkap ma di hami" , hape alus na ro: "Ndang na hutanda hamu". Bah.. ndang adong di buku daftar tàmu hape. Ndang adong ID Card-na. Palito dohot miakna do ID Card-na nian, alai ndang boi idaon manang jahaon be, gabe so ditanda.

Refleksi

Dia do na gabe hadomuan ni jamita tu Minggu Palmarum, penyambutan hamonangan. Sada na sai pinarsinta sian parporangan, i ma hamonangan. Sai tinggil do roha mambege barita hamonangan asa dohit manghalashonsa. Nilehon roha dohot gogo asa dohot iba manghalashonsa. Pangaradeon na songon i do punatuduhon ni umpama on.

Nuaeng, tu hita be na ma singotsingot ni umpama on. Nunga taboto, na ingkon ro do Pangoli i, i ma Tuhan Jesus Kristus, jala hita do oroan si 10 halak i. Holan i, ndang dihalomohon adong sian hita oroan n oto, alai oroan na pantas marroha do. Tu si do sangkap ni jamita on, asa sude hita oroan na pantas marroha. Naeng tutu, lam marsitutu mangarade diri, marhite haporseaon na tutu jala manongtong, mangolu di bagasan hasintongan ni Debata dohot habadiaon tinogutogu ni Tondi Porbadia. Molo tapatudos tu Mat 7:22-23, na naeng mangasahon angka na niulahonna, hape ndang diulahon lomo ni roha ni Tuhan i.

Alai adong do pe hasurunganta nuaeng sian barita na di umpama on, na boi do pe hita nuaeng marsiurupan, masipaingotan, ala adong dope tingki. Pangke ma denggan nuaeng sude potensim gabe miak na denggan i. Ingotonta do, adong do tingkina, ndang boi be hita marsiurupan.

Molo pe adong di turpuk on, disuru nasida manuhor miak, ndang na mangajarhon na adong do pe muse kesempatan dung ro boaboa di haroro ni Pangoli i. Alai naeng patuduhon, ndang marguna be angka usaha dia pe dung ro joujou tu hasampuran rea i.