ALLAH DATANG UNTUK MENYEMBUHKAN, Oleh Pdt Dr Robinson Butarbutar (Ketua Rapat Pendeta HKBP) Mazmur 126:1-6

Ro do Jahowa Pahisarhon

`

1.     Marningot  pambahenan ni Debata di ngolunta jolma di tingki na salpu songon pamonaan ni tangiang alualu tu Ibana mangidohon asa dipatupa Ibana na songon i nang di parungkilon niadopan nuaeng, huhut dung i patolhashon tona sian i asa na manaon nuaeng unang mandate alai marsihohot marpangkirimon ala di ujungna ro do las ni roha songon naung diida bangso i di ngolu nasida rap dohot Debata di  tingki na salpu, i do na pinatupa ni parPsalmen 126 on.  Asa sada Psalmen na mangurupi angka na porsea asa hot marhaporseaon di Debata do Psalmen on, i ma di Debata na paruarhon na tartaban, na ro pahisarhon ngolu nasida. Angka naung ruar sian hatartabanon gabe hisar ma ngoluna, hisar secara holistik. Ala ni i, ia tona ni jamita minggu Adven na patoluhon on, i ma ia Debatanta i Debata na ro pahisarhon ngolu ni na porsea na tartaban di tingki na salpu dohot na tartaban dope nuaeng on di ganup konteks ni ngolu ni na porsea i nuaeng do.

2.     Parjolo, marningot pambahenan ni Debata na balga. Dia ma pambahenan ni Debata Jahowa na balga tu ngolu ni bangso na manurathon dohot mangendehon Psalmen 126 on na niingot nasida?  I ma mamboan bangso i ruar sian hatartabanon (Heber: syibeth), sada hamamasa na mambahen angka bangso na asing mangauhon dohot manghatindangkon, martaringot taringot tusi, sada ulaon na tuk parohon hilas ni roha di tongatonga ni bangso naung tarbuang saleleng 70 taon i. Mangondolhon hilas ni roha i dipangke hata: “Parengkelon ni pamangan, olopolop ni dila” (ayat 1-3).  

Hatartabanon ni sasahalak, saripe, sapunguan, sada bangso masa do di pardalanan ni hajolmaon sian tingki tu tingki, sian na robi sahat tu tingki on. Marragam do rumang ni hatartabanon, sian hatartabanon politis, ekonomis, psikologis, sosial, nang partondion pe tahe. Bahat do na hot dope di bagasan hatartabanon, ndang dung dope malua sian i. Hot dope di bagasan hatartabanon.  Alai adong do naung ruar sian i, ala ni perjuangan nasida isara marhite sinjata manang diplomasi. Alai ianggo haruruar ni bangsoNa Jehuda Haruruar sian Babel na pinaingotingot ni angka bangso dohot bangsoNa Jehuda nang parPsalmen 126 on ndang haruruar siala ni sinjata dohot diplomasi, alai ala ni ulaon nab alga pinatuba ni Debata do.

Di Parpsalmen ringkot situtu do marningot  ulaon na balga binahen ni Debata paruarhon  sasahalak sian hatartabanonna. Tung beha pe kondisi ni ngolunta nuaeng, sotung lupa hita marningot ulaon na balga pinatupa ni Debata tu hita, marningot partingkian las ni roha di tingki na salpu.  Boi do haluaon ni haluaon partondion, alai laos boi do haluaon I haluaon politis, ekonomis, psikologis, dohot sosial.

3.       Paduahon, marojahan tu ulaon na balga pinatupa ni Debata i, pasahathon nuaeng tangiang pangidoan tu Debata asa boanonna mulak nasida na tartaban dope nuaeng on (ayat 4).\

Molo taingot dia na ingkon adopan ni bangso Jehuda di Judea nang di Jerusalem dung mulak nasida sian habuangan na di Babel i, boi do antusanta boasa tubu tangiang on. 

a.       Adong dope na mian di bagasan hatartabanon di Babel, na so olo rap mulak dohot nasida tu Judea, na manghilala dumenggan ma mian di hatartabanan di Babel sian na mulak tu Judea mangadopi ngolu na maol, i ma ngolu na mamungka imbaru muse, mamonai sian nol.

b.      Di angka naung mulak pe, satongkin do las ni roha i martahan. Na boi do tuk na binoan nasida sian Babel pangkeonnasida mangolu di Judea. Alai sadia leleng ma i martahan?  Sadia leleng ma martahan hilas ni roha i. Hatop do ro hamaolon ni ngolu, ala ni na so migor hatop berhasil ulaon membangun kembali puing-puing ni Jerusalem. Arga ma nang angka situhoron na ringkot asa boi mangolu. Ro muse tantangan sian bagas sian duru. Migor hatop ma mago las ni roha i. Migor adong ma na manghilala dumenggan do ngolu na tartaban di Babel.

(Patudos jaman reformasi di bangsonta. Di bonana i i nama las ni rohanta. Alai ala manang piga taon ndang apala migor ro parbue na uli sian reformasi, adong do na manghasiholi tingki Orde Baru, adong na manghasiholi mamarenta muse Soeharto. Tuani ma migor tarpillit Presidenta sinuaeng, gabe lam moru ma angka na manghasiholi haroro ni era Orde Baru).

c.       Jala adong do ra tong angka na pamatangna nunga sahat di Judea, alai tondina, rohana, dohot parangena parange ni na tartaban dope.  Ndang ruar dope sian hatartabanan.

Siala ni i do ditangiangkon tangiang on: “Sai boan ma mulak angka na tartaban sian hami” (ayat 4). 

Maol do membangun kembali reruntuhan molo adong di roha ni sasahalak manang sada punguan roha na tong tartaban dope, roha na so rade mangadopi na hinamaol ni na membangun kembali sian reruntuhan. Maol do manguba roha na songon i.

Siala ni i do dipangido parPsalmen on tu Debata asa diuduti Ibana ulaonNa di tongatonga ni bangsoNa i di Jerusalem dohot Judea: Ingkon Debata do na mamboan ruar sian hatartabanon ni  roha, pingkiran nang tondi ni bangso i, na (i) atik pe nunga mulak, alai tartaban dope roha nang pingkiranna, (ii) Na so haru rade dope mulak sian habuangan Babel, na manghilala dumenggan dope ngolu di Babel sian ngolu na ingkon mamungka sian bona di Jerusalem, bona na mansai maol situtu. Ingkon Debata do na pahisarhon singkop.  Porlu do pangantusion dohot ngolu na dipahisar singkop, ndang holan pardagingon, alai saluhut parngoluan.

4.       Napatoluhon, tona na imbaru: I ma semangat juang na timbo di bagasan panghimion na togu.  

Tona on boi do rajumonta dipasahat tu angka na tongon membangun kembali reruntuhan alai mangadopi tantangan. Laos boi do tu na bangkol roha ruar sian roha hatartabanan, siala manghilala dohot marnida na maol situtu do ngolu na mamonai, siala ndang pos roha di tingki manggotil di ari na ro (ayat 5-6). Dia ma tona i?  Diuhirhon ma tona on sian dunia pertanian, i ma adong manabur, laos adong manggotil:

“Angka na mariluilu laho manabur, marolopolop do sogot laho manggotil. Mardalandalan pe ibana huhut tangis pausungusung boi sisaburhononhon, ro do ibana sogot marolopolop mangusung angka tibalanna.

Dison tarida hinamaol ni ulaon na mamonai, manabur boni di tano na naung leleng tarulang, gok hodok, halojaon nang iluilu, alai di ujungna adong do panggotilon, panen.

5.       Asa mansai ringkot do angka na porsea i marsiajar sian hinabagas ni haporseaon ni parPsalmen i laho manogunogu bangsona, sada bangso na naung mandai haluaon sian Debata di tingki na salpu, alai tongon mangadopi hamaolon ni ngolu di tingki nuaeng, na siala ni i gabe ndang marpos ni roha di hadedenggan ni ngoluna di tingki na ro, gariada gabe manghaporseai dohot manghasiholi muse na dumenggan do ngolu na mian di bagasan hatartabanon. Tonana i ma: Ingot habalgaon ni ulaon ni Debata di ngolum di tingki na salpu, di na ro Ibana pahisarhon ngolum na mambahen hilas roham, alai di na mangadopi hamaolon ni ngolu naung malua sian hatartabanan i nuaeng ringkot do tongtong manghirim ho, ai ganup na manabur boni di bagasan iluilu nang tangis idaonna do tingki manggotil, tingki mangusung tibalan di tingki na ro.

6.       Tona na songon i ringkot do soarahonon dohot haposan ni angka siihuthon Jesus di portibion nuaeng di tongatonga ni ngoluna: I ma angka na naung dipahisar Debata singkop marhite Jesus Kristus, alai na nuaeng di ngoluna mangadopi marragam hamaolon ni ngolu, na siala ni i gabe agoan panghirimon dohot semangat ngolu na bekerja keras  ai di ujungna ro ma tingki manggotil.

7.       Mansai ringkot do i tutu di tingkinta nuaeng on di tongatonga ni ngolu na porsea i di portibion.

(a)    Sihalashononta do pambahenan ni Debata na pahisarhon hita, marhite na paluahon hita ganup siap hatartabananta be. Taingot ma na naung diparuar Debata marhite Jesus Kristus I bahat hita halak Batak. Taingot ma tong mamuji Debata di haruruarta bangso Indonesia sian hatartabanonta. Taingot ma tong haruruarta be sian hatartabanonta na marragam i di ngolunta marsadasada, i ma angka na tagoari pasupasu partondion pinalumehon ni Debata tu hita be.

(b)   Di na mangadopi ngolu na maol naung pinahisar ni Debata i di ngolunta nuaeng, di na adong dope sian tongatonga ni donganta jolma na tartaban, na mambahen ngolunta boi maol, unang ma hita manguhumi nasida, alai taboan ma nasida di tangiangta asa dipahisar Debata nang nasida, asa diparuar Debata , nasida sian hatartabanon nasida. Tondi na ra martangiang tu Debata manangiangkon nasida mansai porlu do di tingki Adven on.

(c)    Molo hira na maol ngolungolunta angka naung pinahisar ni Debata nuaeng on, unang ma migor mandele hita, gabe mulak tu manang manghasiholi ngolu na di bagasan hatartabanan, alai ingkon bekerja keras do hita mangatur ngolunta on dohot nasa parbinotoan na boi taguruhon niuluhon ni angka uluanta na denggan, alai huhut ma di bagasan panghirimon na donganon ni Debata do hita di na manabur sahat tu na manggotil.

Mansai ringkot do na patoluhon on patupaon ni angka na porsea i di Indonesia on, parsidohot manumpahi tondi kerja keras na pinatuduhon ni Presiden Jokowi na marusaha mangisi denggan ngolu ni bangsonta naung leleng ruar sian hatartabanan alai tong dope marnida adong sian tongatonganta na tong tartaban dope jala na manghasiholi ngolu na tartaban ala ndang olo kerja keras. Holan marhite na kerja keras marpanghirimon na togu do boi hita mandungdung sintasinta ni bangsonta, i ma hadumaon na tigor. Donganon ni Debata do hita patupahon i.

Pdt. Dr. Robinson Butarbutar