Supaya Mereka Menjadi Satu, Yohannes 17:20-23, Pdt Dr Robinson Butarbutar

Minggu XIII Dung Trinitatis, 26 Agustus 2018

Evangelium: Joh 17: 20-23

Pdt Dr. Robinson Butarbutar

“Asa Sada Nasida Saluhutna”

Marsiajar sian isi ni Johannes 17, mansai tarapul do roha di na mangolu, mangula                            dohot mandungdung sintasinta songon i nang patupahon na denggan molo binoto tangkas na sai ditangiangkon Jesus Kristus Tuhanta i do hita di sudena i. Ndang holan uju rap Ibana dohot angka

siseanNa di Palestina na jolo dipatupa Ibana songon i, i ma manangiangkon angka siseanNa tu Ama i andorang so tadingkononNa nasida di ngolu pardagingon, dung sai rap nasida di bagasan tolu taon. Alai sahat tu nuaeng dipatupa Ibana do i mangondihon angka siseanNa dung manaek Ibana tu banuga ginjang jala hundul di siamun ni Debata Ama i. Jala marhite TondiNa Tondi porbadia i pe sai rap do Ibana di bagasan ngolu ni angka siseanNa i uju mian nasida di bagasan hata nang patikNa, i ma masihaholongan. Siala ni i, mansai denggan do ganup hita angka siseanna nuaeng marningot tongtong na ditangiangkon Jesus i do hita sahat tu sadarion dohot di joloan on.  

Di Evangelium Johannes bindu 17 adong do tolu tangiang ni Jesus tu jolo ni AmaNa di na ditaili Ibana tu banua ginjang. Sada sian tangiangna i, i ma na patoluhon, do na gabe jamita tu tongatonganta di Minggu XIII Dung Trinitatis on. Andorang so sahat hita tu na tangiang na patoluhon i, ringkot do taboto dua tangiangna na parjolo i.   

Naparjolo i ma tangiang pangaramotion: Asa diramoti Debata Ama i hita angka siseanna, sisean na parjolo i dohot angka sisean na asing na gabe porsea tu Jesus Kristus songon SipaluaNa dohot GuruNa siala ni panindangion ni angka sisean i dohot na asing dung nasida, didonganan ni Tondi Porbagia i (ayat 12, 15b).

Di partingkian ni Jesus mansai ringkot do i pasahaton ni Jesus tu AmaNa, ai borhat ma Ibana sian tongatonga nasida, hape sian pamerengon hajolmaon sada punguan na mansai metmet jala so marhagogoon sisampulu sada sisean i (17: 13). Sahat tu nuaeng, Ibana na hundul di siamun ni Ama i di banua ginjang manongtong do manangiangkon hita sude (Heber 7: 25). Ndang adong nanggo sada sian hita na so tinangiangkonna asa tongtong diramoti Debata. Tangiang pangaramotion on ndang holan asa diramoti Debata Ama i hita sian angka bencana-bencana alam na lam so boi tongtong hatop diprediksi, sian angka krisis-krisis ekonomi nang politik, nang sosial dohot budaya, songon i nang krisis partondion marsasahalak,  alai tarlumobi i ma sian angka sangkap-sangkap dohot ulaula ni huaso ni sibolis dohot angka paranganna na naeng manaik hita sian Jesus Kristus.

Napaduahon, i ma asa parbadiaon ni Debata hita (17: 17). Manongtong do ampit tangiang on ala di portibion hita, i ma sada inganan ngolunta marsaor di portibion dohot angka donganta jolma na tupa ndang mandalanhon ngoluna marhabadiaon, baliksa gok angka sangkap dohot ulaon hajahaton na maralo tu lomo di roha ni Debata, na boi mambahen nang hita ramun. Di portibion dope hita mangolu. 

Ringkot situtu do na Debata sandiri mamparbadiahon hita, ndang baliksa hita sandiri mamparbadiahon hita. Ai sian gogonta ndang tarbahen hita mamastihon na sai tongtong hita mangolu songon pamatang ni Kristus na badia i. Sai dais dope hita tu haramunon, sian sangkapsangkapta sandiri, dohot na so tasangajo, manang di duru ni hagogoonta padaohon dirinta sian angka na mangaramuni dirinta, tarlumobi molo ndang dope dipaias ateatenta sian angka sangkapsangkap na roa dohot na jahat.

Alai napatoluhon, na nunga diarbis di ayat 11 alai diulakhon tumangkas di ayat 20-23 on, i ma tangiang hasadaon, asa sada angka siseanna na sampulu sada i nang sude na gabe porsea dung ditogihon angka hata ni angka sisean i, mamungka sian di tingki ni Jesus sahat tu nuaeng, ndang holan sama angka sisean na sampulu sada i (17: 20-21), alai sama nasida dohot na asing di ganup tingki nang inganan. Hasadaon tinangiangkonna ndang holan hasadaan sama sisean, alai dohot do sama sisean dohot Jesus nang dohot AmaNa (ayat 21), laos dohot do hasadaan ni tolu i: Hita angka sisean dohot Jesus nang dohot Amanta. 

Maol do mamastihon asa manongtong sada angka sisean na 11 halak i, ai nang di tingki ni Jesus rap dohot sisampulu dua i, rentan do nasida tu parbolatbolatan, na boi tubu tarlumobi siala ni angka kepentingan-kepentingan na maralo tu lomo ni roha ni Jesus, songon i nang siala ni parasingasingan di sintasinta, hatauon, dna. Di tingki rap dohot nasida dope Jesus, sai boi dope dipasadasada Ibana nasida. Alai dung ndang rap be Ibana dohot nasida, mansai muraura do angka sisean i ndang sada.

Di pardalanan ni huria ni Jesus Kristus di portibion, mamungka sian abad parjolo sahat tu nuaeng, tangkas do hinamaol ni mangaramoti hasadaon ni angka na porsea i. Hasadaon ni angka sisean na sampulu dua i dohot sada apostel na asing pe di taon tolu puluan sahat tu taon lima puluan, i ma dohot apostel Paulus dohot angka donganna na marbarita na uli tu na so Jahudi nunga maol. Di tongatonga ni angka huria di angka jabu na di kota-kota kekaisaran Romawi  pe nunga masa nang parbolatbolaton.  Ndang holan hasadaon ni rumang ni parpunguan, alai hasadaon ni panandaion taringot tu diri, pangajarion nang lomo ni roha ni Kristus i pe ndang dapot. Siala ni marasingasing parbue ni tondi jinalo ni angka na porsea i pe boi do huria i gabe ndang marsada. Parasingasingan pangantusion taringot tu songon dia ma angka na porsea i mangolu di portibion pe, marasingasing do. Asing luat asing pangantusionna taringot tu dia do parange ngolu sidalanhononhon. Masa songon i. Jala na jumorbut i ma gabe boi marsalihi dohot masihansitan hita angka siseanNa sahat tu nuaeng. Pola tahe masiagoan hosa ni donganna.   Sudena i masa atik pe sude do mandok na sada do Tuhanta, sada do Tondi Porbadia, jala sada na haporseaon, sada pandidion (Epesus 4: 16).  

Dipatupa pe gerakan-gerakan Oikumene sian bona sahat tu saonnari, tarlumobi mamungka 1948 dung Porang Portibi Paduahon, atik pe mansai bahat usaha-usaha laho pasadahon angka huria di portibion mamungka sian tingki i, ndang apala boi dohonon na naung boi Hakristenon marlas ni roha situtu ala nunga sahat hasadaon i di tongatonga ni angka na porsea di portibion. Sai diusahahon do asa lam denggan hasadaon ni naporsea, alai sai tabege do marulak loni na marbolat parsaoran ni angka huria di sude tirket, mamungka sian huria na ummetmet, i ma pardongan saripeon, shat tu na umbalga, i ma di tongatonga ni punguan ni na porsea na marpungu di bagasan partangiangan sahat tu punguan huria nang sahat tu tirket hatopan ni huria i. Najumorbut i ma, parbolatbolatonta i sahat tu barbarlosung, tu sandok portibion, jala ndang mago be barita taringot tusi, ala nunga disebarhon jala disurathon di facebook.  Jala parpudion pe godang do angka na mardomu tu etika Kristen, isara taringot tu LGBT, na mamolat huria. (Adong do hasil studi pinaruar ni Komisi Iman dohot Tata Gereja ni Dewan Gereja-gereja Sedunia  na pabotohon di angka ajaran etika dia do halak Kristen di portibion ndang sapandapot, jala dia ma sipatupaon nasida asa boi ndang pe marasingasing pangantusioonna be alai boi masiargaan. (Ida: Moral Discernment in the Churches (WCC, 2013).

Siala ni i do umbahen na ringkot nang nuaeng parungkilhononta isi ni tangiang ni Jesus i, i ma asa sada hita, songon Ibana na sada dohot Ama i. Boasa ringkot? Ala molo ndang sada hita, baliksa molo marbolatbolat hita, lam ma marsalisi, marbada, pola masihosoman, mambahen na hansit tu dongan siala ni pangantusion na so sada, jala ndang boi masiargaan pandapot na marasing,  ba dang tarbahen portibion manghaporseai na Ama i do na marsuru Jesus

Alai ndang marlapatan i na so marguna tangiang ni Jesus i di bonana sahat tu nuaeng: Ingkon tujuan sidungdungon ni na porsea i do i, ala ia so i ndang tarbahen ni portibion manghaporseai  dua na mansai arga, i ma (i) na Ama  do na manongos Jesus Kristus tu portibion; (ii) na sada do Jesus dohot AmaNa, jala (iii) na sada do hita dohot Jesus nang Ama i.

Boasa porlu na tolu i di partingkianta sinuaeng? Ala dipasada internet do portibion nuaeng, alai dibolati angka kepentingan sempit dohot sepihak ni hajolmaon. Lapatanna, adong kesempatan manggohi isi ni  tangiang ni Jesus, alai bahat do tong tantanganna, na klassik dohot na imbaru.

Nuaeng hita mangolu di sada abad na sangombas patuduhon na terjejaring do hampir sude jolma sada dohot na asing di sandok portibion hinorhon ni haradeon ni komunikasi internet na mansai bidang jala hatop, alai sangombas nari boi tong dohonon na lam marbolatbolat hajolmaon i siala ni marragam sibonsiri, dohot ma i siala ni perbedaan-perbedaan na lohot tu eksistensi, karakter, hasomalan, jati diri,  pamingkirion, sihol ni roha, dohot angka na asing di hadirion ni jolma i.  Hita mangolu di sada abad na patuduhon adong ancaman tu hajolmaon, i ma bencana global pemanasan bumi na torus lam mohop molo so marsada jolma i mangoruisa. Ndang boi holan sada bangso pasohon i.

Taboto do i. Alai ndang tarbahen angka bangso dope marhite PBB tangkas pasohothon hananangkok ni mohop ni portibion. Pangurupion ni angka negara-negara maju tu angka negara-negara berkembang dohot negara-negara na pogos asa unang diuduti nasida manabai hau ni harangan nasida dohot membangun angka patrik-pabrik na mamangke angka bahan bakar na parohon polusi udara jojotjot ndang apala boi dope pasohon angka negara-negara i marsitutu parsidohot mangoroi angka ulaon na mambahen lap mohop portibion. Tamba ni i, laho mangalo hapogoson di portibion pe ndang boi dope marsada jolma i. Songon nang pasohothon parporangan. Di tirket global nang lokal, di parsaoran ni angka bangso sahat tu parsaoran na ummetmet di tongatonga ni angka keluarga pe tahe mansai bahat do na boi mambahen sega parsaoran.

Alai na dumangol dope i ma lam bahat do angka masalah-masalah na imbaru di tongatonga ni hajolmaon na so boi sada dialusi angka huria. Ndang holan di angka ajaran taringot tu dia sihaporseaon, alai laos dohot do nang di ajaran taringot tu songon dia ma jolma i mandalanhon parange na denggan (etika hidup). Bahat do perbedaan-perbedaan pamingkirion ni halak Kristen di portibion, sian sada negara tu negara na asing,  isarana taringot tu  parsaoran transgender nandang sapingkiran sude huria-huria di portibion.  Hape molo so sada pingkiran ni angka huria di portibion, beha ma bahenonna manogihon halak asa porsea di Jesus Kristus?

Pasombuonta do i? Ndang ra. Tabonai ma di bagasta, di tongatonga ni keluarga  songon siiuhuthon Jesus, songon i nang di tongatongan ni pandita, di parsaoranta rap dohot halak Kristen di ingananta dohot parsaoranta. Molo ndang boi hita pasadasadahon, ba pinomat ndang hita sandiri mamolatmolat.

Mansai ringkot do i di tongatongan i parsaoran ni angka na porsea di huriahuria, dohot nang di tongatonga ni angka huria ni Huria Kristen Batak Protestan. Siala ni hinaadong ni komunikasi internet na mansai hatop, mansai mura do sar barita parbolatbolaton di tongatonga ni hurianta, sian barita taringot tu na denggan di tongatonga ni hurianta.  Parpudi on sai hatophatop do masuk tu internete, jala memviral  barita taringot tu manang piga hurianta na so haru sada, mambahen maila sude bohi ni HKBP. Molo tapasombo i, di ujungna gabe ndang porsea be halak di barita na uli pinatolhas ni sude ruas nang parhalado di HKBP. Ndang porsea be halak tu baritanta na Jesus Kristus do  sipalua i.  Molo ganup ruas ni huria Kristen Batak Protestan nang angka ruas ni huria na di pe di portibion mangaradoti hasadaon nasida be, lam bahat ma angka na porsea di Jesus Kristus, nang di hasadaonta dohot Ibanan/Ama i.