Penjelasan Evanggelum Kitab Markus 1:21-28 Pdt Dr Robinson Butarbutar

Jamita Evangelium 20 Januari 2019

Minggu II Dung Epiphanias

Hagogoon ni Debata na Pangoluhon (Markus 1: 21-28)

Di taon 69/70 dung Kristus, di na manurathon Evangeliumna si Markus, i ma sahalak donganta siihuthon Jesus sian generasi paduahon Hakristenon dung dibege ibana sian apostel Petrus taringot tu hadirion dohot ulaon ni Jesus naung tarbarita, tardok umbahatan do angka pangisi ni Kekaisaran Romawi porsea di angka huaso ni  angka tondi na so boi idaon ni simalolong ni jolma. Porsea nasida adong angka tondi i di duru ni jolma, na marhuaso mangatur, manggugai dohot mangantoi ngolu ni jolma. Jotjot ndang tuk jolma i mangadopi angka i. Porsea nasida na marhuaso do angka tondi i mamasuhi dohot mangingani nang manusai ngolu ni jolma.

Molo masuk angka tondi na jahat i tu, jala mian di ngolu ni sahalak jolma, porsuk ma ngoluna. Susa. Manaon. Patupaon ni angka i ma angka sahit tu ibana. Ndang tarbahen jolma na nimasuhan dohot niinganan ni i mangalosa.  Mansai gogo do nasida. Tung adong pe angka datu na boi patupa angka dalan laho pabalihon angka tondi i sian ngolu ni jolma niinganannasida i, ndang tarbahen nasida malua sian angka huaso i. Na tangkas marlomolomo do angka tondi i manusai ngolu ni jolma i. Mahuaso situtu do angka i. Di goari do angka tondi i angka tondi na jahat. Di hata Gorik digoari nasida tondi na so ias, pneuma akatharta (Markus 1: 21), tondi na hodar. Tarsude do angka jolma na mangolu di toru ni huaso Kekaisaran Romawi di sandok propinsi Romawi na mangantusi songon i, ndang marimbar angka halak Jahudi na mangolu di Palestina, inganan pangulaon ni Jesus Kristus tar opat pulu taon andorang so manurathon evangeliumna i si Markus.

Siala ni i dapot antusonta do boasa di Evangelium sinuratna i, dung jolo disurathon si Markus  angka na mangihut on, - i ma taringot tu ulaon ni Johannes Pandidi na paradehon haroro ni Jesus, pandidion ni Jesus, pangunjunan niadopanNa, jamitaNa taringot tu hinaringkot ni hamubaon ni roha dohot haporseaon di barita na uli ala nunga ro harajaon ni Debata dohot panjouon ni angka siseanna (ida Markus 1: 1-20), songon i nang pangajarionna di bagas parpunguan ni halak Jahudi (Jaha: Synagogoe) di Kapernaum (1: 21) -,  ia barita na uli na parjolo na ginurithon ni si Markus taringot tu hadirion ni Jesus i ma na marhadomuan tu huaso ni Jesus na mangatasi huaso ni angka tondi na hodar i.  Dung bindu 1: 21-28 on, di evangelium Markus dipatuduhon do hinagogo ni huaso ni Jesus i maralohon angka tondi na hodar i. Ndang tarbahen nasida mangadopi Jesus. Gari Sibolis na mangunjuni Jesus nunga ditaluhon Ibana, ba lam ma angka tondi na hodari. Di evangelium Lukas dibaritahon do hat ani Jesus na mandok nunga iiida Ibana madabu Sibolis i (Lukas 10: 18).

Ala ni i do, di Markus 1: 21-28 on, mansai nalnal do digurithon si Markus huaso ni Jesus i di barita di barita parjolo taringot tu ulaon ni Jesus songon Anak ni Debata na hinaholongonNa i (1: 1, 11, 15: 39):  Ndang holan digurithon parnidaan ni angka Sibotosurat ni Jahudi taringot tu huaso ni Jesus i, alai dohot do hata ni angka tondi na hodar i sandiri taringot tu huaso ni Jesus na mangatasi huaso nasida  digurithon si Markus.  Hagogoon ni huasoNa i mambahen tarsonggot jala digohi roha na longang angka Sibotosurat i nang angka na manangihon pangajarionNa na marhuaso i (1: 22).

Parjolo, sahalak pangajari na marhuaso do ia Jesus i, ummarhuasoan sian angka pangajari ni halak Jahudi, i ma angka Sibotosurat (Gorik: Grammateus, ida Markus 1: 22). Marsangaja do Markus manoarahon i marhite na manggurithon dua na mangihut on laho mangondolhon i: Tarsonggot jala digohi roha na longang (Gorik: eks-eplessonto, Markus 1: 22; Batak: Longang) jala longang situtu (Gorik: ethambethesan) do angka Sibotosurat nang  angka na torop di sinagoge di Kapernaum tinopot ni Jesus. Dung ditangihon jala diida nasida pangajarion ni Jesus. Boasa?

-          Ala imbaru jala mardonganhon huaso pangajarionNa. Ndang songon pangajarion ni angka sibotosurat i pangajarionna. Imbaru do. Ibana mangajari songon na mardonganhon dohot digohi huaso (Gorik: hos eksousian echon. Di hata Batak di ayat 22 didok : songon na marsahala, jala di ayat 27 didok mardonganhon huaso).  Hasurungan ni hinatimbo ni hatauon ni Jesus mangajari di tongatonga ni sada bangso na mananda bahat pangajari taringut tu uhum dohot habisuhon ni ngolu nunga tarbarita sian bona ni ulaon ni Jesus sahat tu ujung. Marbisuk jala marhuaso do pangajarion ni Jesus. Tarbarita do i uju di ngoluna, ndang holan di luat Galilea, alai dohot do di luat na asing. Ndang holan di abad parjolo, alai dohot do sahat tu nuaeng.  Ndang taralo ni angka pangajari ni halak Jahudi huaso pangajarion ni Jesus.  Imbaru jala songon sahalak na marhuaso do Jesus mangajari. Ndang membosankan pangajarion ni Jesus. Imbaru. Menyegarkan. Laos marhuaso. Molo tajahai angka buku Evangelium I tangkas do huaso pangajarion ni Jesus i.

-          Ala nang angka tondi nahodar mananda ise Jesus i di nasida, i ma Nabadia ni Debata (Markus 1: 24), umboto huasoNa na mangatasi huaso nasida sandiri, jala unduk do nasida tu hata parenta ni Jesus i na mamarentahon nasida ruar sian sahalak niinganannasida i  (Markus 1: 24-27).

Na dohot tong ditariashon Evangelis Markus di Evangeliumna di bindu 1: 21-28 on, i ma na mangihut on:

Marroha pangoluhon do ianggo huaso ni Jesus na mangatasi huaso ni angka tondi na hodar i. Balik ni huaso ni angka tondi na hodar i do huaso ni Jesus. Ianggo huaso nasida na gumogo sian jolma niinganan nasida manusai do, pasingkorsingkor ngolu nasida.  Ndang huaso na pamatehon. Ndang huaso na manusai, songon na pinatupa ni angka tondi na hodar i, i ma pola manarat (Gorik: sparaxan) jolma niinganannasida i, alai pangoluhon do. Jolma na niinganan jala sinusaan ni angka tondi na hodar i dipalua Jesus sian huaso na mangarahut nasida, asa denggan mangolu. Dipabali Jesus do angka tondi nahodar i sian jolma niinganannasida i, asa mangolu nasida.

Jala molo tapamanat, nang angka tondi na hodar i ndang diripashon  (Gorik: Apolesai, sian hata apolummi = mangaripashon; Markus 1: 24) Jesus. Dirajumi angka tondi nahodar i do na naeng mangarimpashon nasida ia sangkap haroro ni Jesus i tu sinagoge i. Marasing sian terjamahan Bibel bahasa Batak, na mameakhon hata ni tondi na hodar i tu Jesus marrumangkon pernyataan (“Na ro do Ho hape mangago hami.”), ianggo di hata Gorik marrumangkon sungunsungkun do ruar hata i sian nasida: “Na laho mangago  hami do Ho umbahen ro”? (ayat 24). Ala marrumangkon sungkunsungkun do hata nasida, ia alus ni Jesus tu nasida ndang apala mangalusisa dohot alus positif. Alai na pinatupa ni Jesus i ma, mamarenta nasida asa ruar sian jolma niinganannasida i.  Holan diparuar manang dipabali  (Gorik: ekselthe) Jesus do nasida marhite parenta  na digohi huaso (Markus 1: 25), asa mangolu jolma niinganannasida i.  Tarbarita do hagogoon ni huaso ni Jesus pabali angka tondi nahodar.  Mangihuthon angka peneliti, di partigkian ni Jesus adong do angka pangajari ni halak Jahudi na tuk pabali tondi na hodar. Alai ndang songon huaso ni Jesus ia huaso nasida. Ndang taralo nasida hagogoon ni huaso ni Jesus  i. Di hata Inggris didok, ia hagogon ni huaso ni Jesus ndang taralo ni manang ise. Mabiar jala unduk do angka tondi na hodar i diadopan ni Jesus. Bahat na gabe malum sian sahitna, gabe marngolu na denggan. Ditanda nasida do Jesus Anak ni Nabadia i.

Marojahan tu barita na uli na di ginjang i taringot tu hinagogo ni huaso ni Jesus na mangatasi huaso ni angka tondi na hodar i (Markus 1: 21-28) i ma dipillit gabe tema ni jamitanta di Minggu II dung Epiphanias na mangihut on: Hagogoon ni Debata na pangoluhon. Tangkas do huaso ni Jesus na gumogo sian huaso pangajarion ni angka Sibotosurat dohot sian huaso ni angka tondi na hodar i. Sangombas, dipangolu ibana do na niinganan jala na pinasaratsarat ni tondi na hodar i, marhite nai pabali tondi na hodar i sian ibana. Gabe mangolu ibana. Sangombas nari taida, ndang apala diago manang dirimpashon Jesus tondi na hodar i, alai dipabali do.

Hagogoon ni huasoNa na mangatasi angka huaso ni tondi na hodar ndang laho pamatehon, alai laho  pangoluhon angka na ginosagosa ni angka tondi na hodar i do. Ndang disalahgunakan Jesus gogo ni huasoNa i laho patupa na so denggan tu hajolmaon. Dipabali do angka tondi na hodar i sian na nimiannasida I, asa mangolu denggan. Alai ndang diago manang diripashon Jesus tondi na hodar na manggosa na niingananna i.  Siala ni i gabe boi antusonta boasa di panorangion ni  Jesus di umpamaNa taringot tu simarememe i (Mateus 13: 36-43), dipasombu do angka na manaburhon simaremeeme i sahat ro di ari panguhuman sogot. Disi ma nasida diuhum. Ndang nuaeng nasida paripashon Jesus. Alai di ari panguhuman i do nasida diuhum.  On do tiniru dohot niajarhon ni angka apostel di surat nasida. Isara apostel Paulus na mangajarhon asa unang sarombang dohot portibion hita mangadopi angka parjahat: Ndang mamalossa, alai pasahathon tu Debata ulaon mamaloshon (Rom 12: 19).

Dia ma naboi rimangrimangonta taringot hagogoon ni huaso ni Jesus Nabadia ni Debata  na pangoluhon i nuaeng di partingkianta na digohi angka huaso na manggosgosa angka na metmet dohot na so mardihadiha, angka jolma nang angka na tinompa na asing pe?

Parjolo, tangkas dope taauhon na di ngolunta sian na jolo sahat tu nuaeng, tarlumobi ma nuaeng on, na mangatasi angka parhuaso, tarlumobi angka tondi na hodar di portibion do ia Jesus Kristus Tuhanta  i? Di surat Kolosse dohot surat Epesus tung tangkas do disurathon panurat na naung ditaluhon Jesus do angka huaso na di banua ginjang dohot na di banua tonga dohot na di banua toru, nuaeng nang sogot pe (Kol 2: 10, 15, Epesus 1: 21-22).

-          Marhuaso dope di roha, pingkiran, ateate nang tondinta angka pangajarion ni Jesus na ginurithon ni angka panurat Evangelium na opat i sahat tu nuaeng?

Di simalolong ni angka Sibotosurat di bagas parpunguan na di Kapernaum  i najolo margogo situtu do huaso pangajarion ni Jesus.  Angka ajar ni Jesus i nunga taboto be, i ma angka ajar taringot tu songon dia hita manghaholongi Debata dohot donganta jolma. 

Boasa ingkon rimangrimangonta saulan nari angka ajar ni Jesus i nuaeng di abad padua pulu sadahon on?  Alus tusi: Atik beha ndang be ajar ni Jesus tahangoluhon di ngolunta, baliksa angka ajar na asing nama. Atik beha nunga angka ajar na asing na ma na naung taajarhon?

Paduahon, tangkas dope taauhon na marhuaso do Jesus mandongani hita maralohon manang mangadopi angka huaso na adong di portibion, i ma angka huaso ni angka tondi na hodar na sai manusai ngolu ni jolma? Taauhon dope na ia huaso ni Debata pangoluhon hita do? Sotung maon nunga gabe taida huaso ni Debata mangago hita, siala ni hasalaan ni jolma i na manegai portibion dohot siala ni angka ulaon ni jolma na jat mangago ngolunta?

Angka tondi na hodar i nuaeng ndang holan angka tondi na hodar songon na di Markus 1: 21-28 i na mura antusan ni angka na porsea di angka i, alai dohot do angka tondi na hodar na marasing hataridaanna sian na di Markus 1: 21-28 i, isara  komunisme, konsumerisme, ketergantungan tu penyalahgunaan narkoba, hedonism, hamongkuson, individualisme, atheisme, lomo ni roha tu na manghatindangkon hata na so tutu, hoax, dohot angka na asing, i ma angka ideologi-ideologi.

Patoluhon, rade dope hita marsiajar sian tiruan na binahen ni Jesus Kristus di huaso nilehon ni Debata tu Ibana uju mangula Ibana di Palestina najolo, i ma:

(i)                 Mamangke huaso na jinaloNa sian Debata i tu hita laho paluahon dohot pangoluhon angka halak na niinganan dohot nigosagosa ni angka tondi na hodar na marragam i di partingkianta nuaeng, i ma na tradisional dohot na modern dohot na postmodern, i ma na manghaporseai adong dope angka tondi na hodar na so tarida tu hita.

(ii)               Songon angka naung pinalua ni Debata di bagasan Jesus Kristus, jala songon angka na manjalo pasupasu sian Debata uju manghatindangkon haporseaon i hita, na mandongani hita maralohon nasa na jat dohot mamargogoihon hita patupahon nasa na denggan, mansai ringkot do tarimangrimangi songon dia hita mamangke huaso pinasasahat ni Debata tu hita. Di angka ulaonta be dipasahat do tu hita angka huaso marhite angka ulaon nang angka jabatan di marragam rumang ni ulaon manang profesinta. Denggan do sungkunhononta tu dirinta sungkunsungkun on: Angka na mamangke gogo dohot huaso na pangoluhon do hita manang baliksa, na mangarimpashon ngolu ni donganta jolma nang ngolu ni angka donganta na tinompa ni Debata di portibion?  Molo tadapot dirinta parhuaso na so pangoluhon, di jabu, di ulaon nang di parsaoranta, denggan ma hita muba. Alai molo parhuaso n agogo na pangoluhon do hita, denggan do tauduti. Denggan do taurupi angka sundut na umposo asa maniru Jesus Kristus parhuaso nagogo na pangoluhon.  Lam timbo huaso na pinasahat ni Debata nang angka donganta jolma tu hita, lam gabe parroha na pangoluhon ma hita.

(iii)             Maradophon angka tondi na hodar i sandiri, manang maradophon angka na mangulahon na jat di portibion: Ndang mangarimpashon nasida. Nang mangago nasida, alai tuk ma holan pabali nasida sian na manegai ngolu ni dongan jolma, marusaha asa ruar nasida sian ulaon na manggosagosa donganta jolma nang angka na tinompa ni Debata na asing. Marasing do on tu tondi na mansai diskriminatif na tubu di bahat jolma nuaeng on. Pola angka na so sapingkiran dohot nasida naeng agohononna. Mansai ringkot do tarimangrimang on.  

Tiruan na binahen ni Jesus Kristus on do maradophon angka tondi na hodar i na naung dipahembang Hakristenon sahat tu nuaeng. Isarana ditulak Hakristenon do hukuman mati tu angka parjahat. Ditulak Hakristenon do nang angka kebijakan mamangke kekerasan di dunia pendidikan, di jabu nang di parsingkolaan, tu angka na taida patupa angka kesalahan dohot hajahaton. I do umbahen na diajarhon apostel Paulus asa unang tabaloshon hajahaton dohot hajahaton.

Sai dipargogoi Tuhanta ma hita manghaporseai hagogoon ni huaso ni Debata na mangatasi saluhut, angka tondi na hodar nang angka na marasing sian i. Sai dipargogi ma hita maniru hagogon ni Debata na pangoluhon di na mangalangka hita di ngolunta dohot taula angka ulaonta be. Amen.

Pdt. Dr. Robinson Butarbutar, sian Parsameanta, STT-HKBP. WA/HP: 0812-62472015.