Penjelasan Sermon Pdt Dr Robinson Butarbutar Matius 13:53-58

Jamita Evangelium, 3 Pebruari 2019

Minggu IV Dung Epiphanias

Hagogoon ni Haporseaon di Jesus Kristus: Patupa Bahat Halongangan.

(Matetus 13: 53-58)

Tolu ma panurat Evangelium na manggurithon ulaon pangajarion ni Jesus di parpunguan ni halak Jahudi (=Sinagoge) di huta hagodanganna, i ma di Nasaret, Galilea di abad parjolo. Natolu i ima: Markus 6: 1-6 na digurithon di taon 69/70, Lukas 4: 15-30, na digurithon di taon 80, dohot Mateus 13: 53-58, na digurithon ditaon 85 Dung Kristus.   Atik pe marholang 10 taon sian Markus Evangelium Lukas digurithon, jala 15 taon marholang Evangelium Mateus sian Evangelium Markus, jala marholang hurang  40 taon Evangelium Markus sian hamamasa ni Jesus di Palestina adnorang so digurithon, atik pe umbahat dipatorang Lukas taringot tu hata na ruar sian pamangan ni Jesus disi jala panghataionNa dohot sitangi Ibana disi,  dos do tolunsa mangurithon taringot tu dia na masa disi, i ma:

(i)                 Mangajari dohot patupa halongangan Jesus mardongan habisuhon dohot hagogoon na paro longang ni roha, atik pe ditanda jala dipandohi nasida na sada sian parhuta i manang anak ni parhuta i na so pola nagogo natorasna dohot  anggi nang ibotona do ia Jesus;

(ii)               I pe, ndang dijangkon na tumangihon pangajarionNa i, i ma dongan sahutanNa i Jesus, ndang porsea nasida di Ibana. Diboto Jesus do i sian tradisi ni angka panurirang.

(iii)             Siala ni i gabe holan sada (Markus), ndang haru piga  (Lukas) dipatupa Jesus ulaon hagogoonNa manang Tanda Halongangan.

Domu tusi, na mangihut on ringkot taparateatehon:

(i)                 Naparjolo, di Evangelium Lukas dipaboa do aha isi ni pangajarion ni Jesus di sindagoge i, i ma paboahon na tongon digohi Ibana do isi ni panurirangion ni panurirang Jesaya, i ma Mamaritahon Barita Nauli, barita Haluaon tu angka napogos, angka na ditindos, na di hurungan, na mapitung; alai di Evangelium Markus ndang apala dipaboa i.

(ii)               Napaduahon, di Evangelium Lukas dipaboa do na baliksa porsea gabe gok rimas do  angka sitangihon pangajarionNa i, pabali ibana, jala naeng mamunu Jesus, i ma marhite na mamboan ibana tu tolping ni dolok ojahan ni huta Nasaret i, laho manggulanghon Ibana sian i (Lukas 4: 28-29). Alai di Evangelium Markus dohot Mateus ndang sahat tusi. Holan taringot tu on do: Asing ni pamalum na hansitan disi, ndang adong diula Jesus ulaon hagogoon na asing (Markus 6: 6), manang ndang haru piga ulaon hagogoon disi dipatupa Jesus (Mateus 13: 58) ala na so porsea i nasida.

Siala ni i, tangkas ma tona ni turpuk ni tolunsa Evangelium i, tu ganup na manjahasa i ma: Tarbahen Jesus Kristus i do gumodang ulaon hagogooNa di tongatonga ni na manghaporsea Ibana na jolo, nuaeng nang di ariai na ro, i ma na Naung Ro mamboan barita nauli na paluahon angka na tung mangharingkontsonsa. Di duru ni haporseaon otik do na mangonjar ibana/na tarbahensa patupa halongangan. Ndang ala ni donganna sahuta nasida gabe ingkon patupaonNa tanda halongangan disi. Ingkon haporseaon do suhatsuhat dohot ojahanNa patupa halongangan di ngolu ni jolma. Ndang pardongansahutaon. Ndang nepotisme. Ala mangula di duru ni angka batas-batas manang suhat-suhat hajolmaon, pardongansahutaon, keluarga, mudar, dohot na domu tusi, martua ma angka na porsea di Ibana, sian dia pe haroroan nasida, ai di tongatonga nasida tarbahensa do patupa angka tanda halongangan. 

Di tingki  mangula Jesus di hutaNa di Nasaret, Galilea-Palestina, abad parjolo donganNa sahuta do sitangi jamita dohot pangajarionNa dohot siida halongangan na boi binahenNa. Dung i marhite angka siseanNa, marhite angka naposoNa do Jesus mangulahon ulaonNa mamaritahon barita taringot tu harajaon ni Debata, pabali tondi na hodar, pamalum na marsahit dohot mangajarajari,, mambungka mat ani na mapitung. Sian tona ni Mateus 13: 53-58 dohot angka ayat paralelna i, dua tona na mangihuth on mansai ringkot rimangrimangon niangihon dohot sibaritahon turpuk on:

1.      Tu angka Sijaha dohot Sitangi Hata ni Tuhanta

Tu angka sijaha hataNa manang sitangi jamita domu tu Jesus Kristus (pangajarion nang ulaonNa manghophop, mamasumasu nang mangaramoti hita) sian angka naposoNa ringkot mangarimangrimangi sungkunsungkun on: 

(i)                 Di ngolunta on, tung beha pe parbinotoan, hadirion nang hatauonta mangihuthon suhatsuhat ni hajolmaon laho andungdung sintasintanta marhite angka ulaonta I di era artifisial intelligence on, tahaporluhon dope/tongtong Jesus Kristus i di pargulmiton ni ngolunta.  Harugion do di ngolunta molo tapasiding Jesus Kristus, hape na rade do Ibana mamasumasu hita.

(ii)               Molo naeng dapotan tua/haluaon ho/hita sian Ibana, ndang adong na asing dalanta dapotan  i nda holan haporseaon tu Ibana dohot manghaposa hata manang pangajarionNa.

(iii)             Unang ma songon halak Jahudi najolo na, atik pe longang marnida pangjarionNa na gok huaso dohot hagogoonNa pamalum na marsahit di tongatonga nasida, ndang porsea tu Jesus, baliksa pabali Ibana sian tongatonga nasida, jala naeng mamunu Jesus.

(iv)              Beha do panangihononmu di angka jamita na naung tinangihonmu pinasahat ni naposo ni Jesus Kristus, angka parbarita na uli? Marnida bohi do hamu, mamillitmillit parjamita i dohot hat ani Debata jinamitahonna marguru tu hagiothagiotta? Ndang baliksa, i ma manghaporseai hata ni Debata binaritahon ni naposoNa?  Panghorhonna gabe ndang tarbahen hamu manghaporseai Jesus i sandiri dohot hataNa binaritahon ni angka naposoNa i? Siala ni i gabe ndang diida manang ndang didai  Ho hinauli dohot hinajogi ni hagogoon ni Jesus Kristus di tongatonga ni ngolum, ngolu ni keluargam, ulaonmu, dna.

(v)                Molo songon i dope saleleng on, ba muba ma. Tu joloan on unang apala ruhut parduru ni hata ni Debata dohot jamita marojahan tu hata ni Debata be ho manangihonsa, alai sai patujolo ma marhaporseaon tu Ibana nang marhite na manghaposi hataNa binegem.

(vi)              Molo nunga diida ho hagogoon ni Debata saleleng on di ngolu nang di ulaonmu ala dihaporseai jala diulahon Ho angka hata ni Debata jinaham dohot binegem, ba puji ma Debata. Tangiangkon ma asa lam ditiop Debata haporseaonmi, unang madabu.

2.      Tu angka sipasahat barita na uli

Tu angka parbarita nauli na marbarita na uli di dekade paduahon abad pa-21-hon on, i ma angka naposo ni Yesus Kristus, angka parbarita nauli.

(i)                 Di na mamaritahon barita nauli di ganup partingkian parjamitaon naung tabolus, jala tu joloan on, molo adong panulahion tu jamitanta siala ni marasing sibonsiri, dohot ma i siala donganta sahuta, saparmeaman, donganta na mananda hita jala angka ruas ni keluarganta dohot keluarga bolonta, unang ma apala menet rohanta. Boi do i ndang siala ndang denggan taparade jamitanta, alai ala – songon Jesus na mangajari dohot hapistaran, parbinotoan nang huaso na mambahen longang roha sitangihon Ibana – na marnida bohi do nasida jala, impolana, ala na so porsea do nasida di Jesus Kristus i sandiri, jala di angka hataNa.  Di Lukas 4: 15-30 i, ndang porsea dongan sahuta ni Jesus i di isi ni pangajarion ni Jesus na mandok na di bagasan diri dohot ulaonNa do digohi Debata ulaon dohot sangkap haroroNa tu portibion, i ma mamaritahon barita na uli, barita haluaon tu angka na metmet, na tinondos ni halak dohot na di hurungan. Ndang porsea nasida di Jesus na naeng patupahon i.

(ii) Di angka parbarita na uli na gabe mangadopi angka na maol, isara direngkes, ala tutu situtu mamaritahon hatani Tuhanta Jesus Kristus na mangido hamubaon ni roha tu ganup na manangihon hataNa, pola sampai dilululi jala dipatupa nasida dalan manusai ngolum, unang ma pola menet rohanta, ai nang Tuhanta Jesus Kristus i diadopi Ibana do na dos. Alai hot do Ibana mangulahon ulaonNa, unduk tu lomo ni roha ni Amana na manongos hita. Hot ma hita tongtong. Unang ganggu.  Hot hita mamaritahon impola ni haroro ni Kristus tu portibion, ndang holan laho paluahon angka pardosa jala pasahat hangoluan na manongtong tu angka na porsea di Ibana nang mamasumasu nasida, alai dohot do laho pasahathon hinaringkot ni haluaon tu angka na ginosagosa, angka na di hurungan, angka na pogos, angka na mapitung. Asa muba halak na mambahen nasida songon i, jala asa dipatupa angka na tumangihon jamitanta ulaon paluahon songon na gabe sintuhu ni ulaon ni Jesus i, i ma haluaon na komprehensif. Asa unang mabiar nasida patupahon angka ulaon na paluahon hajolmaon, baliksa lam togu, lam hiras, lam kreatif dohot lam inovaif, asa lam moru manang mago angka na pogos, angka na tarhurung, angka na marsahit, angka na mapitung, jala asa lam denggan ngolu ni angka donganta jolma.  Molo manulak nasida ala so olo muba, gabe ngolunta disusai, songon panusai ni dongan sahuta ni Jesus tu Ibana, pola naeng manggulangkon Ibana sian atas ni huta Nasaret, ba unang tarsonggot hita, alai martogu ni roha ma.

(ii) Di na mamaritahon barita na uli taringot tu hadirion, ulaon nang hatani Jesus, beha do hita manjamitahonsa saleleng on?

-          Suraon do adong sian tongatonganta na so porsea di Ibana jala ndang ps roha di hataNa, atik pe parjamita hita?

-          Suraon do adong sian tongatonganta na ndang jolo manghaporseai jinamitahonna i, alai baliksa pasahathonsa songon sahalak na holan mamaritahon alai ndang manghaporseaisa?

-          Suraon do siala ni ndang tahaporseai gabe ndang apala sian nasa roha, gogo, nang pangaradeion taparade jala tapasahat jamitanta taringot tu Jesus Kristus i, hataNa nang pangajarionNa?

Di na manangihon nang mamaritahon hat ani Jesus hita, mansai ringkot do hita manghaporseai Ibana, asa tarbahen Ibana angka ulaon hagogoon di tongatonganta. Molo ndang porsea hita, ban dang tarbahensa patupa halonganan di ngolu ni sitangihon hataNa, jala ndang tarbahen hita marnida halongangan di parbue ni jamitanta. Amen.