PENJELASAN ALKITAB MATIUS 16:13-20 Oleh Pdt Dr Robinson Butarbutar

Jamita Evangelium, 3 Maret 2019

Minggu Estomihi,  Mateus 16: 13-20

Pdt Dr Robinson Butarbutar

Jesus Mesias, Anak ni Debata Na Mangolu

Di minggu Estomihi sadarion, di na tapasahat di tangiangta asa Debata gabe partanobatoanta di ngolunta di portibion, dienet gabe jamita di hita hataNa na tarsurat di Evangelium 16: 13-20 na paandarhon tu hita panindangion ni Apostel Petrus taringot tu ise di angka siseanNa na parjolo i ia Jesus i. Marhite na umbege panindangion ni Apostel Petrus i, boi hita lam patoguhon panindangionta na dos di Tuhanta Jesus Kristus di partingkianta nuaeng di inganan, ngolu, ulaon, pargulmiton ni ngolu nang parsaoranta be dohot angka donganta jolma.

Panindangionna i dipatolhas ibana di Kaesarea Pilippi dung diida ibana dohot angka donganna sisean na sampulu sada nari paraloon niadopan ni Jesus sian angka uluan ni ugamo Jahudi. Panindangionna i dipatolhas ibana andorang so dipabotohon Jesus parjolo sahali  tu ibana dohot angka donganna sisean sangkapNa borhat tu Jerusalem laho manaon naporsuk disi sian angka sintua ni natorop, sintua ni malim nang sian siboto surat, pola ingkon mate bunuon nasida (Mat 13: 21).

Panindangion ni apostel Petrus na gabe jamita di hita laho patoguhon pangauhononta na Debata do partanobatoanta di ngolunta on dienet sian Evangelium Mateus 16: 13-20 na marisihon dua impola.

Naparjolo, i ma panindangion ni apostel Petrus na tar umbidang saotik sian panindangionna sinurathon ni evangelium Markus (Markus 8: 27-30) dohot evangelium Lukas (Lukas 9: 18-21). Molo di evangelium Markus, na disurat di taon 69/70 isi ni panindangion ni apostel Petrus mandok na “Kristus “ do Jesus di si Petrus (Mrk 5: 29), jala di evangelium Lukas na disurat di taon 80 mandok “Kristus ni Debata” do Jesus i di Petrus (Lk 9: 20), alai di evangelium Mateus na disurat di taon 85 ia Jesus i di si Petrus i ma “Kristus anak ni Debata na mangolu i do” (Mat 16: 15). Adong dipahantus evangelium Mateus hatorangan taringot tu ise Kristus manang Mesias i di si Petrus, i ma “anak ni Debata na mangolu i”.

Panindangion ni apostel Petrus on ndang tubu boti, alai nunga jolo ditanda ibana Jesus na naung manjou ibana gabe apostelna i, “Anak ni Debata na mangolu i” di pengalamanna uju naeng lonong ibana dung mardalan di atas ni aek ala ni biarna, di na dipalua Jesus ibana sian hamatean. Di pengalaman i, dung diboto ibana hagogoon ni Jesus paluahon ibana sian hamatean i, didok Petrus ma songon on tu Jesus, “Tutu do Ho Anak ni Debata” (Mateus 14: 33). Nuaeng di na diboto apostel Petrus paraloon ni adopan ni Jesus sian angka uluan ni ugamo Jahudi ditambahon ma na ia Jesus i Anak ni Debata “na mangolu i” do. (Catatan: Di pardalanan ni tradisi ni isi ni panindangion ni Petrus sinurathon ni Mateus on adong do na mansubo mangambolongkon hata “na mangolu i”, laos adong do na manggontihonsa dohot hata “na paluahon i.”).

Atik pe dipatihi Jesus tu angka siseanna uju rap dope nasida di Palestina asa unang pola dipaboaboa nasida na Kristus/Mesias do ibana (Mat 16: 20) uju rap dope nasida, nunga tangkas di haporseaon ni angka siseanNa na Mesias do Jesus i nang andorang so manaon Ibana di silang i, nang andorang so hehe Ibana sian hamatean. Marragam do dilehon angka na mangalehon alus boasa diorai Jesus angka siseanna uju rap dope nasida paboaoahon na Mesias Ibana, alai ndang apala i nuaeng na rumingkot di hita angka naung manghatindangkon na Mesias i do Ibana di hita. Na rumingkot i ma umboto tangkas na mamungka sian andorang so manaon Ibana di Jerusalem nunga dihatindangkon apostel Petrus na Mesias do Jesus i, jala anak ni Debata na mangolu i do Jesus Mesias i. Ndang holan di angka huria na adong di abad parjolo, alai di angka huria na adong di portibion dung i sahat tu nuaeng laos i do isi ni panindangion ni sandok siiuhuthon dohot sisomba Jesus: Ia Jesus i Mesias Anak ni Debata na mangolu.

Ala sian evangelium Mateus do jamita di hita sadarion, mansai ringkot do lam taauhon ia Jesus Mesias i anak ni Debata na mangolu i do, na di minggu Estomihi on naeng lam taondolhon di tangiangta tu Ibana na Ibana do partanobatoanta. Ndang adong na asing di portibion na boi gabe partanobatoanta mandalani ngolunta on.  Molo adong sian tongatonganta na sanga gumale panindangion haporseaonNa di Jesus songon Mesias, anak ni Debata na mangolu i sahat ro di nuaeng dohot ro di saleleng ni lelengna, mansai ringkot do pauba dirinta. Tauduti ma manghaposi Ibana songon partanobatoanta.

Napaduahon, laos diuduti do na gabe jamita di hita di minggu Estomihi on dohot hata ni Jesus Kristus Anak ni Debata na mangolu i tu isi ni panindangion ni apostel Petrus i, i ma na tarsurat di ayat 17-19 i.

Ianggo di evangelium Markus dohot Lukas ndang  apala adong udut ni panindangion ni Petrus i disurathon. Alai di roha ni panurat ni evangelium Mateus mansai ringkot do i botoonta angka siihuthon Jesus, tarlumobi ala di tingkinta nuaeng bahat do tantangan tu hita di na manindangi di ha-Mesias-on ni Jesus anak ni Debata na mangolu i. Bahat do tangangan na ro tu angka huria ni Kristus Jesus di portibion, na boi mambahen olo menek rohanta, manang mambahen hita ganggu di hasisintong ni panindangion ni apostel Petrus dohot panindangionta mangihuthon Jesus Kristus Sipalua i, ndang holan di angka sundut na matua, alai dohot do di angka sundut na umposo na mangolu di era artificial intelligence nuaeng, dohot na mangadopi lam bahat tantangan ni ngolu nang tantangan mandungdung sintasinta ni ngoluna. Ndang holan di angka na pogos, alai dohot do di angka na mora. Ndang holan di angka boruboru, alai dohot do di angka dakdanak. Ndang holan di angka na hurang hipas, alai dohot do di angka na hipas pamatangna.

Isi ni panindangion ni apostel Petrus na taiihuthon sahat tu nuaeng on pe nunga mansai bahat dipamenetmenet angka na so sahaporseaon dohot hita, pola adong nang sian tongatonganta na mangolophon usaha pamenetmenethon i. Tondi ni zaman na mandok relatif do sude, relative tong nang haporseaon ni halak Kristen I taringot tu Jesus Mesias Anak ni Debata Sipaluanta i, ala sude na taongku i didok subjektif do.

Siala ni i ringkot do botoonta sian Jesus Mesias Anak ni Debata na mangolu i taringot tu panindangion ni si Petrus dohot panindangionta i. Beha do Jesus marnida pandindangion i? Dia do lapatan ni panindangion i di angka huria na marpungu mamuji Ibana songon Mesias? Jala di tongatongag ni huria na songon i, dia do panghorhon ni panindangion i di ngolu nasida? Adong opat na mansai arga di hita.

Taida ma sada-sada.

1. Panindangion ni Apostel Petrus nang panindangionta i ndang tubu sian daging (Gorik: sarks) manang mudar (Gorik: haima) ni apostel Petrus, alai apala Debata Ama ni Jesus, Amanta, Debata na mangolu i sandiri do na papatarhon i (Gorik: apekalufsen, sian hata kerja, apokaluo) tu ibana, tu hita.  Asi ni roha do i nang tu apostel i sandiri. Ndang sian gogona i, ndang bisukbisukna, alai ulaon ni Debata na di banua ginjang do i na papatarhon i tu ibana dohot tu hita. Na martua (Gorik: Makarios) do ibana, hita ala nunga dipapatar Debata i tu ibana/hita. Ulaon ni Debata do i. Asa ia panindangionna i sintong do ala, ndang na tubu di, pinatubu ni hajolmaonta I non i, na dais tu angka sangkapsangkap na marragam,  alai murni sian Debata do i. Ingkon sitioponta do i gomos nang nuaeng on. Ai i do hasintongan i. Ndang ro sian hajolmaon i, jala ala ni i ndang sipeopon i.

2. Siala ni i gabe panindangion ni si Petrus pinapatar ni Debata tu ibana i do batu mamak (Gorik: petra; Jaha: batu ojahan na togu) bahen hajongjongon ni huria (Gorik: ekklesia). I do pinaboa ni Jesus tu si Petrus, anak ni si Jona i, na ginoaran ni Jesus: Petros. Jesus na Mesias anak ni Debata na mangolu i do ojahan ni Huria i (1 Kor 3: 11). Gariada tahe, siala apostel Petros i do na parjolo manghatindangkonsa, gabe di ginjang ni panindangion ni apostel Petrus i ma pajongjongon ni Jesus Kristus huriaNa. Na martua do si Petrus tutu, na parjolo manghatindangkonsa.  Songon i ma togu ni ojahan, hadirion, hajojongjong ni huria pinajongjong ni Kristus di atas ni batu mamak panindangion na Mesias Anak ni Debata na mangolu i ibana, gabe ndang tarparumpak manang taralo ni manang aha dohot manang ise pe huria i. Angka harbangan ni banua toru (Gorik: pulai hadou;  hata pulai, angka harbangan ni  hades, i ma dunia kematian, naroko, mansai togu do i maniopi hamatean. Siala ni i adong na menerjemahkan hata pulai dohot angka huaso) ndang tarbahensa manaluhon huria i. Sian hata ni Jesus taringot tu huria, ekklesia, sipajongjongjongonNa jala muse pinajongjongNa di atas ni panindangion ni aspotel Petrus i do  lam togu hajongjongon dohot hatongtongon ni huria i sahat tu nuaeng dohot ro di saleleng ni lelengna. Laos songon i do angka ruas ni huria i, na so tarpaeret di angka harbangan ni naroko. 

I do barita na uli sihaposan dohot sitiopon ni angka hita ruas ni huria ni Kristus di portibion. Ndang adong na asing na tuk mandok songon i. Holan Jesus Kristus do na tuk mandok na songon i. Martua ma hita angka ruas ni huria ni Kristus I (ayat 18) ai nang hita halak Kristen Batak dipatau Debata manghatindangkon na dos.

3. Siala ni i do dipasahat Jesus Kristus tu apostel Petrus i ma anak hinsu (Gorik: kleidas)ni harajaon banua ginjang i (ayat 19). I ma huaso na mansai balga dipasahat Jesus Kristus tu angka na manghatindangkon ibana Mesias Anak ni Debata na mangolu i. I ma barita na mansai uli situtu tu hita angka na manghatindangkon Ibana songon i. Ndang holan na so tartaluhon angka pintu harbangan ni naroko na tung gogo situtu i be hita, ndang hamatean jambarta, alai laos ungkap do tu ibana nang hita pintu harajaon banua ginjang i.

4.Udut tusi manang masirainrainan tu naung dipasahat tu ibana anak hunci tu banua ginjang i dipasahat Jesus ma nang  huaso tu apostel Petrus na mansai balga: Na niihotanna di portibion tarihot di banua ginjang, na pinaluana di portibion malua do i di banua ginjang.  Dilehon tu ibana huaso mangihot dohot paluahon.  Ala ni i, marhite hata ni Jesus na patoguhon panindangion ni Apostel Petrus nang panindangionta di Jesus di tingkinta nuaeng, gabe angka na martua ma hita angka sitindangi Ibana i, ai sintong do panindangionta i, i ma na dos tu panindangion ni apostel Petrus, ala sian Debata do i, jala siala ni i sahat tu hita anak hinsu tu harajaon banua ginjang ni Debata, ndang tarpeop angka harbangan ni hamatean/naroko hita, laos dilehon tu hita huaso mangihoti manang paluahon na di portibion, ala tarihot manang malua do i di surgo. Ingkon halashonon, pestahonon, sihamauliatehonon, dohot sitioponta angka na porsea do panindangion sisongon i, ai siala ni i gabe sahat tu hita angka na so dapot hita mangasahon gogonta. Mansai ringkot do patupaonta i di tingkinta nuaeng, ala nunga lam bahat tantangan na manosak hita asa taorui gariada tatadinghon paninangionta di Jesus. Taingot ma hata ni Jesus on tu ganup na porsea tu ibana: “Ai ganup na manghatindangkon ahu di jolo ni jolma, i do hatindanghononku di jolo ni Damang na di banua ginjang I; alai ganup na mansoadahon Ahu di jolo ni jolma, laos soadahononHu do i di jolo ni Damang na di banua ginjang i” (Mateus 10: 32-33). Amen.