Jamita Pdt Dr Robinson Butarbutar Mazmur 118:22-29

Jamita Evangelium di Minggu Okuli, 24 Maret 2019

Jesus do Batu Parsuhi (Psalmen 118: 22-29)

Di hita ganup ruas ni punguan ni angka na porsea di Jesus Kristus mamungka sian abad na parjolo sahat tu nuaeng di abad pa-21-hon on, mansai sentral do isi ni Psalmen 118, tarlumobi ayat 22-29 on. Boasa? Ala sada ayat sian i, i ma ayat 22 i dihatahon Jesus Tuhanta i do tu angka Malim Bolon dohot angka Sintua ni Bangso Jahudi na so olo muba dung dipinsang panurirangionNa i nasida ala mambahen bagas Joro ni Debata na di Jerusalem ndang be bagas partangiangan, alai gabe liang ni pandobo (Mat 21: 11, 13.

I do sada sibonsiri boasa ro Jesus sian Nasaret di Galilea tu Jerusalem di Judea laho paiashon bagas joro i.).  Ndang hamubaon ni roha na pinatupa nasida. Baliksa gabe diparsoalhon nasida do huaso ni Jesus di na paias bagas joro i (Mat 21: 23-27). Ala ni i gabe diuduti Jesus ma koras maminsang nasida marhite umpama taringot tu dua dakdanak i (Mat 21: 23-27), mandok na gabe tu angka sijalo beo dohot boruboru na jahat do na bongot tu harajaon ni Debata i, ndang nasida be. Kumoras dope tahe hata pinsangpinsang ni Jesus tu nasida, ai didok Ibana marhite umpama sahalak namora na mamungka porlak anggur. Naposona dohot ianakkonna dibunu angka pangula ni porlak anggur i (Mat 21: 28-33). Marhite umpama i   didok Jesus manguduti, na buaton ni Debata ma harajaon ni Debata sian angka malim bolon dohot sintua ni bangso i (Mat 21: 33-44).

Ala dirajumi Jesus na siala sogo ni roha nasida mida Jesus naeng pusaon nasida ma Jesus, jala tarida do i muse di na gabe dilului nasida dalan laho manangkup Ibana (Mat 21: 46), gabe dipatujolo Tuhanta Jesus ma mandok tu nasida marhite hata ni Psalmen 118: 22 i: “Ia batu na binolongkon ni angka pande bagas i apala i do gabe batu parsuhisuhi, pinamasa ni Tuhan i jala halongangan do i niida matanta” (Mat 21: 42). Tutu do, ndang leleng dung panghataionnasida di bagas joro i ditangkup do Jesus (Mat 26: 47-26), diboan tu jolo ni Sintua ni malim si Kayafas jala ditijuri disi (Mat 26: 57-68), didabu si Latus uhum tu Ibana (Mat 27: 1-26), siparsilangkon (Mat 27: 27-49), mate (Mat 27: 50-56), ditanom (Mat 27: 27-66), alai dung i hehe (Mat 28: 1-10). Jala marhite haheheonNa i ma gabe batu parsuhi Jesus sian abad parjolo sahat tu nuaeng. Songon i marimpola do Psalmen 118: 22 i di hita angka siihuthon ibana, gabe tahatindangkon do i mamungka sian tingki Padan Naimbaru (Ulaon 4: 11, Epesus 2: 20, nang 1 Pet 7: 7-8).

Marhite na dihatahon Jesus Psalmen 118: 22 i tu angka Malim Bolon dohot angka Sintu ani Bangso Jahudi i uju i gabe mangulahi manindangi ma haporseaon ni parPsalmen i na sinurathonna di sandok Psalmen 118 i, i ma pos ni rohana di hagogoon ni Debata mangurupi ibana mangadopi angka jolma na manghosomi ibana, angka parbegu na manghaliangi ibana (Psalmen 118: 3-17). Songon i toguna pos ni rohaNa mida hagogoon ni Debata na mangondihon ibana i, pola didok: “Ndang tagamon mate ahu, sai na mangolu do ahu, asa hupajojor angka pambahenan ni Jahowa”, ndang tu hamatean ibana dipasahat  (Psal 118: 17-18). Hagogoon ni Debata mangondihon ibana maradophon angka musuna do na mambahen ibana mandok mauliate tu Debata di bona, di parsitongaan dohot di ujung ni Psalmen on (ay 1-2, 21 dohot ay 29), ai pardenggan basa do Ibana ro di salelengnilelengna do asi ni rohaNa.

Ndang adong na boi patupa na songon i, i ma mambahen batu naung binolongkon ni angka pande bagas, gabe batu parsuhi, na so adong be argana dohot gunana, naung diambolongkon, gabe batu parsuhi, ojahan ni bangunan na imbaru. I do na masa tu Jesus. Dipamate Ibana, diparsilangkon di duru ni kota i, di inganan partangkurahan. Alai apala hamamateNa i do na manesa dosa ni angka na porsea di Ibana. HaheheonNa i do gabe ojahan ni haporseaon ni angka siihuthon Ibana sian najolo sahat tu nuaeng jala tu tingki na ro.  Halongangan sian Jahowa do i (Psalm 188: 23). Ari na di bagasanna dipatupa Jahowa halongangan i digoari do ari na jinadihon ni Jahowa, ari na uli, ari las ni roha, tama do marlas ni roha hita disi (Psal 118: 24-25).  Ari ni Jahowa na songon i tama do hamauliatehonon ni naung marnida dohot manghilalahonsa marhite na pasahathon angka pelean pesta. Disi ma patimbulon Debata (Psalm 118: 27-28).  Asa, na boi do dohononta hinabagas ni haporseaon ni parPsalmen di hagogoon ni Debata tu angka na mangasahon Ibana, tu na marsigantung tu Ibana, ai tung dipamate angka jolma, halak sipelebegu pe ibana, na pos do rohaNa ndang tu hamatean ibana dipasahat, alai sai na mangolu do ibana. Gariada tung diambolongkon halak pe ibana songon batu naung diambolongkon, boi do ubaon ni Debata i tu na so tinagam, i ma tu hangoluan, gabe batu parsuhi.

Boasa ma apala di Minggu Okuli on haporseaon ni parPsalemn 118: 1-29 tarlumobi 29: 22 on di na mangadopi angka na di humaliangna na manghosomi ibana (118:7),  haporseaon ni Jesus Kristus (Mat 21: 42) dohot haporseaon ni angka siseanna dung manaek Ibana tu banua ginjang di na dioloi Ibana hataNa asa laho nasida tu liat portibion mamaritahon goarNa (Ulaon 4: 11, Epesus 2: 20, nang 1 Pet 7: 7-8) gabe jamita tu hita di tingkinta nuaeng? Di Minggu Okuli ditogutogu do hita asa songon na hinaporseaon ni parPsalm 25: 15, “Sai tong do mangaranap matangku tu Jahowa, ai Ibana do mangenet tothu sian jorgong”?

ParPsalmen dohot Tuhanta Jesus songon i nang angka siihuthon Ibana di tingki Padan Naimbaru nang dung i sahat tu abad pa-20-hon togu do pos ni rohanasida sude di Jahowa na tuk mangenet totnasida sian jorgong, gariada Tuhanta Jesus manghaposi diriNa na naeng posaon ni angka parhuaso na manulak Ibana bahenon ni Debata do gabe batu parsuhi, jala masa do i sahat tu nuaeng di tongatonga ni angka na manghaporseai Ibana, jala di tingki ajal ni hasiangan on sude tot do marsomba tu Ibana (Phil 2: 10-11).

Beha do hita nuaeng halak Kristen Batak, di na mangadopi tantangan ni ngolu nataadopi di partingkianta nuaeng songon bangso Indonesia. Nunga leleng hita songon sada bangso na tartading ala ni angka na holan mamingkirhon dirina sandiri, sian tongatonganta sandiri dohot sian tongatonga ni angka bangso na balga, na gogo, na umpistar. Di na naeng mardalan maju bangsonta, marrongoman do angka na naeng mangotapi dalanta na denggan nuaeng. Di partingkian na songon i, denggan do hita halak Kristen Batak na manghaposi hagogoon ni Tuhanta di na manindangi di tongatonga ni bangsonta hita marhita angka ulaonta na denggan, asa torus ma matanta mangaranap tu Jahowa. Unang olo hita talu tu angka hagogoon na naeng manait hita dao sian hasintongan nang hatigoranNa. Tauduti ma marhaposan tu Ibana di na tauduti membangun ngolu ni bangsonta on. Disi pe, di na taparade angka sundut naumposonta asa boi parsidohot rap dohot angka anak-anak bangsa membangun bangsonta, tauduti ma manosoi nasida asa mangaranap matanasida tu Jahowa na tuk mambahen batu naung diambolongkon angka pande bagas i gabe batu parsuhi. Nasojadi nasida manginsurut, bermental pengecut, alai bermental pemenang. Ingkon togu ma pos ni roha nasida na patupaon ni Debata do na denggan tu nasida songon angka anak dohot boru naung tinombusna mansai arga. Unang gabe manginsurut nasida sian haporseaon di Debata Sitolusada i. Unang gabe talu nasida tu angka debata ganaganaan binahen ni jolma, na dirimpu jolma boi mangurupi jolma i, dohot ma i angka parbinotoan teknologi na lam dihaposi jolma i. Unang ma hita madabu tu fobia artificial intelligence, i ma na mabiar mangadopi artificial intelligencei, manang  tu utopi artificial intelligence.  Alai hot ma mangaranap tu Jahowa.

Songon huria ni Kristus Jesus di portibion hita, ndang jadi ruas nang pangula ni Huria Kristen Batak Protestan nang angka huria Batak na asing, dohot angka huria na di portibion pe tahe mabiar. Ingkon taingot haporseaon ni Jesus Kristus na togu i, na so mabiar patupahon ulaonNa manurirangi, i ma maminsang angka Malim Bolon dohot angka Sintua ni Bangso Jahudi uju i, songon i nang angka parhuaso na asing na adong di tongatonga ni parngoluanta, manang di dia pe hita maringan dohot mangula, ala nunga dipangke nasida bagasa joro ni Debata gabe bagas pandoboon, ndang be gabe bagas partangiangan. Ndang mabiar ibana diotapi marhite na manangkup Ibana dohot mamarsilangkon Ibana, ai dihaposi Ibana do hagogoon ni Debata songon na pinatuduhon ni parPsalmen i, na so manongos ibana tu hamatean, alai na tuk pangolu Ibana sian hamatean.  Molo Tuhanta na taihuthon jala na tasomba i uju mangula ulaonNa di Palestina ndang mabiar mida angka parhuaso i, hita pe angka siihuthon Ibana unang mabiar hita mida angka huaso na pabiarbiarhon, dohot na mangotapi nang na marsangkap manegai angka ulaonta na uli mangoloi ton ani Tuhanta Jesus Kristus tu hita, di portibion nang di huria i.

Unang ma tahalupahon angka panindangion ni angka na porsea di Bibel i, songon i nang angka panindangion ni naporsea i sian tingki tu tingki, sian sada inganan tu inganan na asing, jala bahat do sian tongatonga ni ruas ni hurianta naung marpanindangian na dos taringot tu hagogoon ni Debata paluahon angka na porsea di Ibana i, jala hinatogu ni angka na porsea i tongtong mangaranap tu Jahowa, tung be pe, manang apala di na taadopi na maol ni ganup ngolunta i. Haposan do IBANA.

Sada ulaon nabalga do papos roha ni ganup generasi Hakristenon na marningot, marsiajjar, dohot mangulahon haporseaon ni Tuhanta Jesus Kristus di Debata AmaNa na tuk pamonang Ibana sian tangan ni angka parhuaso di tingki mangula di portibion Ibana, na mamarsilangkon Ibana gabe idaon so marguna. Alai ingkon ulaon ni angka na porsea i do i di tingki on, ala lam tamba maju ni zaman on, lam tamba angka na naeng manait naporsea i sian haporseaon na togu di ulaon ni Debata pamonang angka na porsea di Ibana, dohot pamonang angka na tigor i.

Denggan do sungkunhononta dirinta ganup marsadasada: Songon dia do nuaeng pos ni roha ni angka siihuthon Jesus di haporseaon na pinatuduhonNa i? Sotung maon nunga manginsurut hita sian haporseaon na songon i, meret tumogu tu haporseaon na mangaranap tu angka na asing na ro tu jolonta, isara haporseaon na sanga najolo tiniop ni angka ompunta sijolojolo tubu na so mananda Debata Sitolusada i, manang haporseaon namarlo tusi, isara tu angka dalan na so tigor laho mangalului na ringkot di ngolunta on? Nunga terbukti haporseaon ni parPsalmen, haporseaon ni Jesus, haporseaon ni angka naporsea di padan na imbaru nang di angka abad dung i sahat tu haporseaon ni angka ruas ni Huria Kristen Batak Protestan di 158 taon na salpu mamolos marragam partingkian di tongatonga ni bangsonta nang di portibi global-on. Beha do haporseaonta disi?

Didongani Tuhanta ma hita di na mangarimangrimangi i sude, na tumua nang naumposo. Dipartondii Ibana ma hita mamareso dirinta be, dohot paimbaruhon dirinta di pos ni roha mida Ibana molo sanga gumale, manang gale, jala ndang disi be haporseaonta tu Debata na tuk pangoluhon na mate i, mambahen batu naung diambolongkon gabe batu parsuhi, songon naung masa di ngolu nang ulaon ni Jesus. Amen

Pdt. Dr. Robinson Butarbutar

Parsameanta STT HKBP (HP/WA 1812-62472015).