PENJELASAN SERMON Pdt Dr Robinson Butarbutar Yesaya 45:18-25

Jamita Evangelium, 27 Januari 2019

Minggu III Dung Epiphanias     

    

“Unduk ma tu Debata Sitompa Saluhut” (Jesaya 45: 18-25)

Sada ulaon na dokdok do maminsang pardosa na so olo muba. Alai dumokdok do patupa ulaon pasahathon uhum na ingkon masa tu marsasahalak manang marsapunguan ala sude angka pinsangpinsang naung marulak loni dipabotohon tu ibana/nasida, ndang maralus di hamubaon. Alai dao dumokdok dope patupa ulaon pasahat  barita nauli situtu tu angka na naung taruhum jala tongon mandalani uhum na mansai dokdok, tu angka naung mansura na ndang adong be dalan tu ngolu na imbaru, tu ngolu na naung malua sian uhum.

Di Bibelta na naung boi tajaha ganup ari i, Bibel cetak dohot Bibel on line i, andar do disi ndang holan patik ni Debata na ingkon siulahonon ni jolma tinompaNa i tarlumobi bangso na pinillitNai, alai dohot do andar disi bahat contoh-contoh ni ulaon ni bangsoNa i na so saurdot tu na pinatikkon ni Debata tu nasida, angka ulaon na mambahen tarrimas Debata.  Laho maminsang nasida asa muba, jala molo so muba asa dipaboa tu nasida sangkap uhum ni Debata tu nasida ditongos Debata ma angka panurirang. Alai dung taruhum nasida, ditongos Debata ma tong angka panurirang laho mamaritahon barita nauli tu bangso naung taruhum i. Di na pasahat pinsangpinsang asa unang taruhum, jala di na pabotohon dia uhum molo so muba, diparbisuhi Debata do angka panurirang i pasahathon hataNa dohot hata na ampit jala tangkas, songon i tangkas jala ampit gabe ndang tarbahen ni na manangihonsa be ndang mangantusisa.

Laos songon i do tong uju pasahat barita nauli tu bangso naung taruhum i Debata marhite panurirangNa, diparbisuhi Debata do panurirangNa pasahat hataNa tu na tongon taruhum i, asa dapot roha nasida isi ni hataNa i jala asa porsea nasida. Gariada tahe, laos di na pasahat barita nauli tu na taruhum i, disangahon Debata do mamanghulingi angka bangso na asing di portibion, i ma angka na naung pinaluaNa di angka bangso i, asa unang maniru pangalaosion ni bangso pinilitna na nuang mampardebatahon na asing na so debata, na so boi paluahon, alai asa manghaporseai Debata na naung mamaritahon barita haluan tu bangsoNa na naung taruhum i jala unduk tu Ibana. Unang be ditiru nasida bangsoNa i na so unduk tu Debata gabe taruhum. Unang be diuduti nasida panombaan tu debata ganaganaan songon nasailaon, baliksa ingkon ro jala unduk ma tong nasida tu Debata, Sasada Debata i, ai holan Ibana do na tuk paluahon.

I do, i ma panurirangion ni panurirang Jesaya na pasahathon barita nauli na sian Debata tu bangso na naung taruhum siala ni dosa mampardebatahon angka na so debata i do ia isi ni hata ni Debata di Jesaya 45: 18-25 i na gabe jamita di minggunta minggu III-hon dung Epiphanias on.  Nunga taruhum bangsoNa di Babilonia. Nuaeng, ndang uhum be sipasahatonNa tu nasida, alai barita haluaon do. Sangkap ni Debata laho paluahon nasida sian uhum. Laho paposhon roha ni bangsoNa i, ingkon tung denggan ma dipasahat panurirang Jesaya i hadirion dohot ulaon ni Debata na tuk paluahon nasida i.

Barita taringot tu sangkap haluaon ginorga ni Debata tu bangsoNa na taruhum i nunga ditariashon panurirang Jesaya andorang so pasahathon dia ma sibotoon nasida taringot tu hadirion dohot ulaon ni Debata asa boi pos  roha nasida di sangkap i. Di ayat 17 do dipaboa  Debata sangkapNa sipatupaonNa tu bangso na taruhum i, i ma patupa tua tu nasida.  Jala, ia tua sipatupaonNa i adong do kualifikasina, i ma ndang asal tua, i ma tua na satongkin, sangombas, alai tua na saleleng ni lelengna do. Di hata Heber ia hata na dipangke tu tua saleleng ni lelengna i, i ma haluaon saleleng ni lelengna (Heber: tesyuat olamim), kelepasan yang kekal. Ala nunga hea dipalua Debata angka ompung ni na nuaeng tarbuang i, mansai ringkot nuaeng kualifikasi ni haluaon i, i ma haluaon na saleleng ni lelengna. Ala na boi pejek do pangantusion taringot tu haluaon i, ingkonn ditambahan tu hata haluaon i “saleleng ni lelengna.”  Tangkas sian i hadirion ni Debata na manangkapi na mansai denggan tu ngolu ni jolma i, tu ngolu ni bangsoNa naung taruhum, i ma haluaon na manongtong. Holan Ibana, sadasada Debata na tuk patuhon i. Di ayat 25, i ma dung dipatorang dijouhon tu angka bangso asa ro tu Jahowa na manangkapi haluaon patupaonna tu bangsoNa jala diojahi i dohot ulaon dohot hata ni Debata di tingki na salpu, diuduti ma patoranghon i marhite na mandok boti:  Ia ngolu ni bangso i gabe marhangoluan na marhatigoran (Heber: tsedeq) dohot na marolopolop, marhaleluya (Heber: weyite-halelu).

Dia ma na taida di ayat 18-24 i?

Naparjolo, ojahan manghaposi sangkap haluaon ni Debata (ayat 18-19).

Asa pos roha nasida di sangkap ginorga manang sipatupaon ni Debata i, dipatolhas Debata ma marhite Jesaya angka na didok rohaNa, dia ma na tuk paposhon roha ni bangso na nuaeng taruhum i na tutu do i na naeng pamasaonNa tu nasida i. Siala ni i do, songon na tarsurat di bona ni ayat 18, dilehon  Jahowa ma ojahan ni sipatupaonNa i. Tangkas do i marhite hata ai, manang, ala (Heber: ki, Indonesia: sebab, karena) laho mangalehon ojahan na togu na impolana mandok sihaposan do sangkap ni Debata i.

Adong dua ojahan  dipatolhas Debata marhite hata pinillit ni si Jesaya papos roha di ayat 18-19, jala ganup sai diujungi dohot pangondolan di hadirionNa, “Ahu do Jahowa.” Na dua i i ma:

(i)                 Hagogoon ni Debata manompa langit dohot tanoon inganan ni jolma mangolu, ndang asa rumar boti.

Dipangke panurirang i do dua kata kerja na dipangke di buku 1 Musa na manurathon taringot tu panompaan ni hasiangan on pinatupa ni Jahowa, jala na tongtong dipangke di sandok Padan Narobi, i ma di hata Heber: bore (sian hata bara) hasiangan on (Heber: hasyamayim), i ma na manompa sian na so adong gabe adong, dohot hata we osyah (sian hata asa), i ma na mangondolhon na mangula aktif do Debata di na manompa tanoon (Heber: haarets). Dua hali be dipangke hata bara dohot asa i laho mangondolhon hagogoon ni Debata namompa sian na so adong (ayat 18). Ulaon na so boi diula manang ise na asing i do na gabe ojahan ni Debata. Ala ni i do didok Debata: “Ahu do Jahowa, jala dungkon ni Ahu ndang adong be.” Di ayat 21 dohot ayat 22 annon, di na dijou Debata angka bangso na asing, i ma angka sisomba debata ganaganaani asa ro manomba Ibana, diulakkon ma muse mangondolhon i: “Ahu do Jahowa, jala dungkon ni Ahu ndang adong be.” 

Molo di buku ni si Musa na lima i dipamanat bangso ni Debata do na adong angka debata na asing, alai holan Jahowa Debata do sisombaon. Alai di Jesaya on, ndang olo Debata mandok na adong na asing na boi dohonon Debata. Angka hau do angka i, na so boi paluahon.

Sahat tu Padan Naimbaru dipangke angka uluan ni huria di ngolu ni huria na parjolo i do ulaon ni Debata na manompa langit dohot tanoon uju tubu  roha na meragukan na hinaporseaon ni na porsea i, i ma haroro ni Jesus na paduahalihon i. Tarida do i di 2 Petrus 3: 3 na disurathon mangalo angka pangajari pargapgap: “Na ro ma di angka ari parpudi angka pangalensem, parhata insakinsak, na mangoloi angka hisapna sandiri, angka na mandok: “Di dia do haroroNa, na pinarbagabaga i? Ai dung monding angka amanta, hot do saluhutna songon i, sian mula ni hasiangan on.” Mangalo i didok panurat ma on: “Laho mandok songon i ndang manganto rohanasida, naung sian aek do langit nang taho, jala hinorhon ni hata ni Debata” (ayat 5).

Di tingkinta, di jaman na mansai maju nuaeng, ndang na imbaru be tabege hata na mandok ndang Debata na manomba langit dohot tano on, alai na manjadi sandiri do i di bagasan partingkian na mansai leleng. Sialoonta do pangantusion na songon i.

(ii)               Hata ni Debata na patar jala sintong manang tigor, ndang na buni dohot di sihabunian, manang di na holom, ndang hoax, ndang na so marojahan. Alai sintong do. Hata ni Debata na marhuaso i do tong sihaposan dohot sipeopon.

Laho mangondolhon i dipangke ma dua kata kerja na mangondolhon hasisintong ni hata ni Debata i, i ma di hata Heber: dabar dohot amar. Di hata Batak dipangke dos, i ma Hudok. HataNa na ruar sian pamanganNa ndang tarsirang sian Debata i sandiri na marhagogoon. Ndang tarbahen manang dang dung ndang sintong, hata ni Debata. Jala domu tu na parjolo di ginjang i, marhagogoon do hata ni Debata na sintong i (ayat 19). I do ojahan ni Debata marhite si Jesaya mandok na, “Ahu do Jahowa na mandok hatigoran (Heber: tsedeq) dohot hasintongan (Heber: hesyarim), ndang na peol.

Napaduahon, joujou tu angka bangso na asing asa ro marluhut dohot paadop bohi dohot Debata, asa unduk tu Ibana (ayat 20-22), ala sasada Ibana do Jahowa na tuk paluahon bangsoNa i jala sude jolma ingkon unduk tu Ibana, na mangalo Ibana pailaonNa (23-24). Laho mangondolhon i, dua hali ma dipatolhas Debata marhite si Jesaya dison, tamba ni na di ayat 18 i, na holan Ibana do Jahowa, ndang adong na asing (ayat 21-22).

Molo  so jamot hita pamanat ayat 20-23 di Bibel hata Batak, gabe boi do hita marnida na hira tu bangsoNa sandiri, i ma naung pinaluaNa sian tongatonga ni angka bangso do, tong Debata manghatai di angka ayat i, ai di hata Batak i dilapati do na tarsurat di Bibel hata Heber ni ayat 20 i, i ma pelite hagoyim, songon on: “Marluhut ma hamu jala ro ma hamu tu lambungKon, hamu ale angka na  naung malua sian bangso parbegu”. Molo on, hira bangso Jehuda na naung dipalua sian angka bangso parbegu na dipanghulingi Debata. Asa unang songon o pangantusionta dumenggan do songon terjemahan di Bibel hata Indonesia talapati hata pelite hagoyim i, i ma ndang  boti, “Marluhut ma ….angka naung malua sian angka bangso”, alai boti: “Marluhut….angka naung malua di tongatonga ni  angka bangso”. Pangalapation na paduahon on umampit tu ayat 22 na patuduhon ndang tu bangso na naeng paluaonNa i (ayat 17) ia roha ni Debata di ayat 20 i, alai tu angka bangso na asing do, i ma tu angka naung malua di tongatonga ni angka bangso na asing i.  (Ise angka on, pelite hagoyim, di tingki ni si Jesaya ndang apala dapot rohanta. Sahat tu saonnari ndang satolop dope angka peneliti taringot tusi. Alai molo dohot do dao tu partingkian tu jolo do pinangkulingan ni Debata di ayat 20 i, ba boi dapot rohanta do i, nasida i ma angka naung malua di angka bangso di portibion.  Lapatanna, dao  tu jolo diida Debata, asa marsiajar sian ngolu ni halak Jahudi nasida muse, i ma bangso na manomba ganaganaan I, unang songon i nasida, alai ingkon unduk tu Jahowa Sasada Debata.

Di ayat 22 dijou Debata Jahowa do asa didonokhon na mangihut on dirinasida tu Debata Jahowa sasadasa: “hamu nasa ujung ni tanoon”, i ma angka bangso na asing i. Tarlumobi tahe, di ayat 23-24 tu sandok jolma do hata ni Debata na mandok na ingkon unduk tu Ibana do sude angka bangso.  Laho patoguhon joujou tu angka bangso i, asa ro nasida tu Jahowa sasada Ibana, dipabagas ma di ayat 23-24 taringot tu hamomonang ni Jahowa di tingki na naeng ro, jala hailaon ni angka jolma na mangalo Debata.

Ala ni i do umbahen na dipillit gabe tema ni jamita on sirimangrimangonta, i ma joujou ni Debata tu hita halak Kristen Batak. Dijouhon  tu hita angka naung pinalua ni Debata marhitehite Jesus Kristus di angka bangso na adong di portibion, alai laos dohot ma angka na asing di portibion dijouhon, asa unduk hita tu Debata na naung manangkapi haluaon saleleng ni lelengna tu bangsoNa Israel na jolo, jala haluaonta halak Kristen Batak ala ni ulaon ni jala di bagasan Jesus Kristus Sipalua i, mamungka sian na dung tardidi hita tu bagasan goar ni Debata Sitolusada i, i ma haluaon saleleng ni lelengna. Ndang na sahat hian hita tu haluaon i. Alai ala Debata Sitompa saluhut i do na manangkapi haluaon ni bangsoNa najolo dohot bangsoNa nuaeng, dijou do tu hita asa holan tu Ibana ma hita unduk, ndang be tu angka debata ganaganaan na marragam i di dekade paduahon abad pa-21-hon on, ndang holan ala ndang tarbahen angka i paluahon hita, alai ala molo ndang unduk hita tu Ibana, baliksa gabe tapardebata jala tasomba  debata ganaganaan i, ba paleaonNa ma hita nuaeng nang di ari sogot.  Mansai ringkot tu lam tatanda hagogoon ni Debata Sitompa saluhut na paluahon hita i asa unang tauji ndang unduk tu Ibana di ngolunta nuaeng, ai ndang adong na malua sian tangan panguhumonNa manang ise na so manomba sasada Ibana, baliksa manomba angka debata ganaganaan i. Mansai ringkot tatanda jala tapangasahon Sitompa hita i ai tarbahen Ibana do paluahon hita sian angka na naeng manaeit hita sian haluaon i.

Hita angka naung pinalua ni Debata di tingki on, tasulingkiti ma dirinta, manang na naung unduk do hita tu Ibana saleleng on, manang tu na asing dope.  Sotung ndang tu Debata na manompa langit dohot tanoon i hita angka na naung pinaluaNa di bagasan Jesus Kristus i unduk, alai tu na asing. Molo i dope, muba ma hita, unang gabe pailaon ni Debata hita di tingkina. Alai martua ma hita molo dung jala hot hita unduk tu Sitompa hita i.

Pdt. Dr. Robinson Butarbutar

Parsameanta, 25 Desember 2019.

HP/WA: 0812-62472015.

Penjelasan Evanggelum Kitab Markus 1:21-28 Pdt Dr Robinson Butarbutar

Jamita Evangelium 20 Januari 2019

Minggu II Dung Epiphanias

Hagogoon ni Debata na Pangoluhon (Markus 1: 21-28)

Di taon 69/70 dung Kristus, di na manurathon Evangeliumna si Markus, i ma sahalak donganta siihuthon Jesus sian generasi paduahon Hakristenon dung dibege ibana sian apostel Petrus taringot tu hadirion dohot ulaon ni Jesus naung tarbarita, tardok umbahatan do angka pangisi ni Kekaisaran Romawi porsea di angka huaso ni  angka tondi na so boi idaon ni simalolong ni jolma. Porsea nasida adong angka tondi i di duru ni jolma, na marhuaso mangatur, manggugai dohot mangantoi ngolu ni jolma. Jotjot ndang tuk jolma i mangadopi angka i. Porsea nasida na marhuaso do angka tondi i mamasuhi dohot mangingani nang manusai ngolu ni jolma.

Molo masuk angka tondi na jahat i tu, jala mian di ngolu ni sahalak jolma, porsuk ma ngoluna. Susa. Manaon. Patupaon ni angka i ma angka sahit tu ibana. Ndang tarbahen jolma na nimasuhan dohot niinganan ni i mangalosa.  Mansai gogo do nasida. Tung adong pe angka datu na boi patupa angka dalan laho pabalihon angka tondi i sian ngolu ni jolma niinganannasida i, ndang tarbahen nasida malua sian angka huaso i. Na tangkas marlomolomo do angka tondi i manusai ngolu ni jolma i. Mahuaso situtu do angka i. Di goari do angka tondi i angka tondi na jahat. Di hata Gorik digoari nasida tondi na so ias, pneuma akatharta (Markus 1: 21), tondi na hodar. Tarsude do angka jolma na mangolu di toru ni huaso Kekaisaran Romawi di sandok propinsi Romawi na mangantusi songon i, ndang marimbar angka halak Jahudi na mangolu di Palestina, inganan pangulaon ni Jesus Kristus tar opat pulu taon andorang so manurathon evangeliumna i si Markus.

Siala ni i dapot antusonta do boasa di Evangelium sinuratna i, dung jolo disurathon si Markus  angka na mangihut on, - i ma taringot tu ulaon ni Johannes Pandidi na paradehon haroro ni Jesus, pandidion ni Jesus, pangunjunan niadopanNa, jamitaNa taringot tu hinaringkot ni hamubaon ni roha dohot haporseaon di barita na uli ala nunga ro harajaon ni Debata dohot panjouon ni angka siseanna (ida Markus 1: 1-20), songon i nang pangajarionna di bagas parpunguan ni halak Jahudi (Jaha: Synagogoe) di Kapernaum (1: 21) -,  ia barita na uli na parjolo na ginurithon ni si Markus taringot tu hadirion ni Jesus i ma na marhadomuan tu huaso ni Jesus na mangatasi huaso ni angka tondi na hodar i.  Dung bindu 1: 21-28 on, di evangelium Markus dipatuduhon do hinagogo ni huaso ni Jesus i maralohon angka tondi na hodar i. Ndang tarbahen nasida mangadopi Jesus. Gari Sibolis na mangunjuni Jesus nunga ditaluhon Ibana, ba lam ma angka tondi na hodari. Di evangelium Lukas dibaritahon do hat ani Jesus na mandok nunga iiida Ibana madabu Sibolis i (Lukas 10: 18).

Ala ni i do, di Markus 1: 21-28 on, mansai nalnal do digurithon si Markus huaso ni Jesus i di barita di barita parjolo taringot tu ulaon ni Jesus songon Anak ni Debata na hinaholongonNa i (1: 1, 11, 15: 39):  Ndang holan digurithon parnidaan ni angka Sibotosurat ni Jahudi taringot tu huaso ni Jesus i, alai dohot do hata ni angka tondi na hodar i sandiri taringot tu huaso ni Jesus na mangatasi huaso nasida  digurithon si Markus.  Hagogoon ni huasoNa i mambahen tarsonggot jala digohi roha na longang angka Sibotosurat i nang angka na manangihon pangajarionNa na marhuaso i (1: 22).

Parjolo, sahalak pangajari na marhuaso do ia Jesus i, ummarhuasoan sian angka pangajari ni halak Jahudi, i ma angka Sibotosurat (Gorik: Grammateus, ida Markus 1: 22). Marsangaja do Markus manoarahon i marhite na manggurithon dua na mangihut on laho mangondolhon i: Tarsonggot jala digohi roha na longang (Gorik: eks-eplessonto, Markus 1: 22; Batak: Longang) jala longang situtu (Gorik: ethambethesan) do angka Sibotosurat nang  angka na torop di sinagoge di Kapernaum tinopot ni Jesus. Dung ditangihon jala diida nasida pangajarion ni Jesus. Boasa?

-          Ala imbaru jala mardonganhon huaso pangajarionNa. Ndang songon pangajarion ni angka sibotosurat i pangajarionna. Imbaru do. Ibana mangajari songon na mardonganhon dohot digohi huaso (Gorik: hos eksousian echon. Di hata Batak di ayat 22 didok : songon na marsahala, jala di ayat 27 didok mardonganhon huaso).  Hasurungan ni hinatimbo ni hatauon ni Jesus mangajari di tongatonga ni sada bangso na mananda bahat pangajari taringut tu uhum dohot habisuhon ni ngolu nunga tarbarita sian bona ni ulaon ni Jesus sahat tu ujung. Marbisuk jala marhuaso do pangajarion ni Jesus. Tarbarita do i uju di ngoluna, ndang holan di luat Galilea, alai dohot do di luat na asing. Ndang holan di abad parjolo, alai dohot do sahat tu nuaeng.  Ndang taralo ni angka pangajari ni halak Jahudi huaso pangajarion ni Jesus.  Imbaru jala songon sahalak na marhuaso do Jesus mangajari. Ndang membosankan pangajarion ni Jesus. Imbaru. Menyegarkan. Laos marhuaso. Molo tajahai angka buku Evangelium I tangkas do huaso pangajarion ni Jesus i.

-          Ala nang angka tondi nahodar mananda ise Jesus i di nasida, i ma Nabadia ni Debata (Markus 1: 24), umboto huasoNa na mangatasi huaso nasida sandiri, jala unduk do nasida tu hata parenta ni Jesus i na mamarentahon nasida ruar sian sahalak niinganannasida i  (Markus 1: 24-27).

Na dohot tong ditariashon Evangelis Markus di Evangeliumna di bindu 1: 21-28 on, i ma na mangihut on:

Marroha pangoluhon do ianggo huaso ni Jesus na mangatasi huaso ni angka tondi na hodar i. Balik ni huaso ni angka tondi na hodar i do huaso ni Jesus. Ianggo huaso nasida na gumogo sian jolma niinganan nasida manusai do, pasingkorsingkor ngolu nasida.  Ndang huaso na pamatehon. Ndang huaso na manusai, songon na pinatupa ni angka tondi na hodar i, i ma pola manarat (Gorik: sparaxan) jolma niinganannasida i, alai pangoluhon do. Jolma na niinganan jala sinusaan ni angka tondi na hodar i dipalua Jesus sian huaso na mangarahut nasida, asa denggan mangolu. Dipabali Jesus do angka tondi nahodar i sian jolma niinganannasida i, asa mangolu nasida.

Jala molo tapamanat, nang angka tondi na hodar i ndang diripashon  (Gorik: Apolesai, sian hata apolummi = mangaripashon; Markus 1: 24) Jesus. Dirajumi angka tondi nahodar i do na naeng mangarimpashon nasida ia sangkap haroro ni Jesus i tu sinagoge i. Marasing sian terjamahan Bibel bahasa Batak, na mameakhon hata ni tondi na hodar i tu Jesus marrumangkon pernyataan (“Na ro do Ho hape mangago hami.”), ianggo di hata Gorik marrumangkon sungunsungkun do ruar hata i sian nasida: “Na laho mangago  hami do Ho umbahen ro”? (ayat 24). Ala marrumangkon sungkunsungkun do hata nasida, ia alus ni Jesus tu nasida ndang apala mangalusisa dohot alus positif. Alai na pinatupa ni Jesus i ma, mamarenta nasida asa ruar sian jolma niinganannasida i.  Holan diparuar manang dipabali  (Gorik: ekselthe) Jesus do nasida marhite parenta  na digohi huaso (Markus 1: 25), asa mangolu jolma niinganannasida i.  Tarbarita do hagogoon ni huaso ni Jesus pabali angka tondi nahodar.  Mangihuthon angka peneliti, di partigkian ni Jesus adong do angka pangajari ni halak Jahudi na tuk pabali tondi na hodar. Alai ndang songon huaso ni Jesus ia huaso nasida. Ndang taralo nasida hagogoon ni huaso ni Jesus  i. Di hata Inggris didok, ia hagogon ni huaso ni Jesus ndang taralo ni manang ise. Mabiar jala unduk do angka tondi na hodar i diadopan ni Jesus. Bahat na gabe malum sian sahitna, gabe marngolu na denggan. Ditanda nasida do Jesus Anak ni Nabadia i.

Marojahan tu barita na uli na di ginjang i taringot tu hinagogo ni huaso ni Jesus na mangatasi huaso ni angka tondi na hodar i (Markus 1: 21-28) i ma dipillit gabe tema ni jamitanta di Minggu II dung Epiphanias na mangihut on: Hagogoon ni Debata na pangoluhon. Tangkas do huaso ni Jesus na gumogo sian huaso pangajarion ni angka Sibotosurat dohot sian huaso ni angka tondi na hodar i. Sangombas, dipangolu ibana do na niinganan jala na pinasaratsarat ni tondi na hodar i, marhite nai pabali tondi na hodar i sian ibana. Gabe mangolu ibana. Sangombas nari taida, ndang apala diago manang dirimpashon Jesus tondi na hodar i, alai dipabali do.

Hagogoon ni huasoNa na mangatasi angka huaso ni tondi na hodar ndang laho pamatehon, alai laho  pangoluhon angka na ginosagosa ni angka tondi na hodar i do. Ndang disalahgunakan Jesus gogo ni huasoNa i laho patupa na so denggan tu hajolmaon. Dipabali do angka tondi na hodar i sian na nimiannasida I, asa mangolu denggan. Alai ndang diago manang diripashon Jesus tondi na hodar na manggosa na niingananna i.  Siala ni i gabe boi antusonta boasa di panorangion ni  Jesus di umpamaNa taringot tu simarememe i (Mateus 13: 36-43), dipasombu do angka na manaburhon simaremeeme i sahat ro di ari panguhuman sogot. Disi ma nasida diuhum. Ndang nuaeng nasida paripashon Jesus. Alai di ari panguhuman i do nasida diuhum.  On do tiniru dohot niajarhon ni angka apostel di surat nasida. Isara apostel Paulus na mangajarhon asa unang sarombang dohot portibion hita mangadopi angka parjahat: Ndang mamalossa, alai pasahathon tu Debata ulaon mamaloshon (Rom 12: 19).

Dia ma naboi rimangrimangonta taringot hagogoon ni huaso ni Jesus Nabadia ni Debata  na pangoluhon i nuaeng di partingkianta na digohi angka huaso na manggosgosa angka na metmet dohot na so mardihadiha, angka jolma nang angka na tinompa na asing pe?

Parjolo, tangkas dope taauhon na di ngolunta sian na jolo sahat tu nuaeng, tarlumobi ma nuaeng on, na mangatasi angka parhuaso, tarlumobi angka tondi na hodar di portibion do ia Jesus Kristus Tuhanta  i? Di surat Kolosse dohot surat Epesus tung tangkas do disurathon panurat na naung ditaluhon Jesus do angka huaso na di banua ginjang dohot na di banua tonga dohot na di banua toru, nuaeng nang sogot pe (Kol 2: 10, 15, Epesus 1: 21-22).

-          Marhuaso dope di roha, pingkiran, ateate nang tondinta angka pangajarion ni Jesus na ginurithon ni angka panurat Evangelium na opat i sahat tu nuaeng?

Di simalolong ni angka Sibotosurat di bagas parpunguan na di Kapernaum  i najolo margogo situtu do huaso pangajarion ni Jesus.  Angka ajar ni Jesus i nunga taboto be, i ma angka ajar taringot tu songon dia hita manghaholongi Debata dohot donganta jolma. 

Boasa ingkon rimangrimangonta saulan nari angka ajar ni Jesus i nuaeng di abad padua pulu sadahon on?  Alus tusi: Atik beha ndang be ajar ni Jesus tahangoluhon di ngolunta, baliksa angka ajar na asing nama. Atik beha nunga angka ajar na asing na ma na naung taajarhon?

Paduahon, tangkas dope taauhon na marhuaso do Jesus mandongani hita maralohon manang mangadopi angka huaso na adong di portibion, i ma angka huaso ni angka tondi na hodar na sai manusai ngolu ni jolma? Taauhon dope na ia huaso ni Debata pangoluhon hita do? Sotung maon nunga gabe taida huaso ni Debata mangago hita, siala ni hasalaan ni jolma i na manegai portibion dohot siala ni angka ulaon ni jolma na jat mangago ngolunta?

Angka tondi na hodar i nuaeng ndang holan angka tondi na hodar songon na di Markus 1: 21-28 i na mura antusan ni angka na porsea di angka i, alai dohot do angka tondi na hodar na marasing hataridaanna sian na di Markus 1: 21-28 i, isara  komunisme, konsumerisme, ketergantungan tu penyalahgunaan narkoba, hedonism, hamongkuson, individualisme, atheisme, lomo ni roha tu na manghatindangkon hata na so tutu, hoax, dohot angka na asing, i ma angka ideologi-ideologi.

Patoluhon, rade dope hita marsiajar sian tiruan na binahen ni Jesus Kristus di huaso nilehon ni Debata tu Ibana uju mangula Ibana di Palestina najolo, i ma:

(i)                 Mamangke huaso na jinaloNa sian Debata i tu hita laho paluahon dohot pangoluhon angka halak na niinganan dohot nigosagosa ni angka tondi na hodar na marragam i di partingkianta nuaeng, i ma na tradisional dohot na modern dohot na postmodern, i ma na manghaporseai adong dope angka tondi na hodar na so tarida tu hita.

(ii)               Songon angka naung pinalua ni Debata di bagasan Jesus Kristus, jala songon angka na manjalo pasupasu sian Debata uju manghatindangkon haporseaon i hita, na mandongani hita maralohon nasa na jat dohot mamargogoihon hita patupahon nasa na denggan, mansai ringkot do tarimangrimangi songon dia hita mamangke huaso pinasasahat ni Debata tu hita. Di angka ulaonta be dipasahat do tu hita angka huaso marhite angka ulaon nang angka jabatan di marragam rumang ni ulaon manang profesinta. Denggan do sungkunhononta tu dirinta sungkunsungkun on: Angka na mamangke gogo dohot huaso na pangoluhon do hita manang baliksa, na mangarimpashon ngolu ni donganta jolma nang ngolu ni angka donganta na tinompa ni Debata di portibion?  Molo tadapot dirinta parhuaso na so pangoluhon, di jabu, di ulaon nang di parsaoranta, denggan ma hita muba. Alai molo parhuaso n agogo na pangoluhon do hita, denggan do tauduti. Denggan do taurupi angka sundut na umposo asa maniru Jesus Kristus parhuaso nagogo na pangoluhon.  Lam timbo huaso na pinasahat ni Debata nang angka donganta jolma tu hita, lam gabe parroha na pangoluhon ma hita.

(iii)             Maradophon angka tondi na hodar i sandiri, manang maradophon angka na mangulahon na jat di portibion: Ndang mangarimpashon nasida. Nang mangago nasida, alai tuk ma holan pabali nasida sian na manegai ngolu ni dongan jolma, marusaha asa ruar nasida sian ulaon na manggosagosa donganta jolma nang angka na tinompa ni Debata na asing. Marasing do on tu tondi na mansai diskriminatif na tubu di bahat jolma nuaeng on. Pola angka na so sapingkiran dohot nasida naeng agohononna. Mansai ringkot do tarimangrimang on.  

Tiruan na binahen ni Jesus Kristus on do maradophon angka tondi na hodar i na naung dipahembang Hakristenon sahat tu nuaeng. Isarana ditulak Hakristenon do hukuman mati tu angka parjahat. Ditulak Hakristenon do nang angka kebijakan mamangke kekerasan di dunia pendidikan, di jabu nang di parsingkolaan, tu angka na taida patupa angka kesalahan dohot hajahaton. I do umbahen na diajarhon apostel Paulus asa unang tabaloshon hajahaton dohot hajahaton.

Sai dipargogoi Tuhanta ma hita manghaporseai hagogoon ni huaso ni Debata na mangatasi saluhut, angka tondi na hodar nang angka na marasing sian i. Sai dipargogi ma hita maniru hagogon ni Debata na pangoluhon di na mangalangka hita di ngolunta dohot taula angka ulaonta be. Amen.

Pdt. Dr. Robinson Butarbutar, sian Parsameanta, STT-HKBP. WA/HP: 0812-62472015.

Penjelasan Yakobus 4:13-17, Hidup Dalam Rancangan dan Kehendak-Nya Pdt Dr Robinson Butarbutar

Jamita Evangelium Minggu Epiphanias, 6 Januari 2019

MANGOLU DI BAGASAN LOMO NI ROHA NANG SANGKAP NI DEBATA

(Jakobus 4: 13-17)

Di hita halak Kristen Batak, di ujung taon Romawi na buruk dohot di bona ni taon Romawi na imbaru, sai marpungu do ganup keluarga besar laho martangiang, masisesaan dosa na diula di taon na buruk, masipodaan dohot masipaboan sangkap tu jolo, huhut manangiangkonsa. Mangihuthon pengalaman empiris, hira tung margogo do tangiang ni angka na porsea i tu ngolu nasida di bona ni taon na imbaru i. Siala ni i do umbahen na sai tahasiholi patupahon i.

Sadarion, apala onom ari di bona ni taon 2019, uju ganup hita manangkapi angka rencana ni ngolu nang angka usahanta di taon 2019 on, dipangkulingi Debata hita marhite hataNa asa di na manangkapi dohot manangiangkon angka sangkap na ulinta i, unang tapadao alai tapahombar ma dirinta nang sangkapta  sian sangkap ni Debata na uli tu hajolmaon dohot tu nasa na adong.  Gariada dipangido tu hita asa mangolu jala mangula hita di bagasan sangkap ni Debata na uli tu hajolmaon nang isi ni portibi on. Tarbahen hita do i, ala – songon nidok ni hataNa di Filippi 2: 13,- “Ai diula Debata do di bagasan hamu giot ni roha nang ulaon saut, mangihuthon lomo ni rohaNa.” Mangula do Debata di bagasan jala marhite ngolunta patupahon sangkapNa. Ai marhite na songon i do boi hita rap dohot apostel Paulus (Rom 14: 7-8) mangauhon impola ni hadirionta naung  tinobusNa mansai arga i, “Ai ganup hita ndang mangolu di dirinta, jala laos ganup hita ndang mate di dirinta. Ai ia mangolu pe hita mangolu di Tuhan i do, jala mate hita mate di Tuhan i do. Asa mangolu manang mate pe hita, tong do di Tuhan i hita.” Songon i hita mamereng dirinta ala nang panodoionna tu hita halak Kristen Batak gabe AnakNa saurdot tu na hinalomohonNa do (Epesus  1: 5), atik pe pardosa hian do hita, na so  parjambar hian gabe parjambar di Kristus, na dao  hian gabe jonok tu ibana pinajonok ni mudarNa i (Epesus 2: 11-15, 19), asa marulaon na denggan hita (Epesus 2: 10). I ma imbar ni ngolu ni na naung pinarpunahon ni Kristus Jesus sian na so pinarpunahonNa. Ingkon sai  tapahombar do ngolu, sangkap nang ulaonta tu lomo  dohot sangkap ni Debata.

Ia hataNa i dienet sian surat Jakobus, i ma surat na marisihon marragam poda tu angka na porsea di sandok portibion sian bona ni hatutubu ni Hakristenon sahat tu nuaeng nang tu joloan on. Martua do angka na porsea na manangihon, mangantusi dohot mangulahon angka poda i. Impola ni angka poda i mangondolhon sada hamubaon pangantusion dohot pambahenan partondion ni angka na porsea, ndang be sarombang dohot pamingkirion ni partingkianta (Rom 12:2). Sada perobahan paradigma (Inggris: paradigm change), sada hamubaon pangantusion dohot pambahenan partondion do niondolhonna.

Adong onom hamubaon pangantusion dohot pambahenan partondion niondolhon ni hat ani Debata di surat Jakobus i. Sada sian na onom i do na di Jakobus 4: 13-17 i.  Masirainrainan do onomsa.  Denggan do molo taida jo dia na lima i. Dung i tapangke ma gumodang tingki tu na paonomhon i na mansai ampit di minggu Epiphanias on, i ma minggu panandaion di hadirion dohot lomo ni roha ni Debata Sitolusada i di pardalanan ni ngolunta marsadasada dohot marsasahuria di portibion, di abad pa-21-hon on.

Naparjolo, somalna sai tapasiding do hadadabunta tu bagasan pangunjunan. Alai hatani Debata  mangajarhon martua do halak na manaon di pangunjunan. I do hataNa, atik pe ndang Debata na mangunjuni hita, alai pangoloion to elaela jala sangkap-sangkap ni roha do na mambahen madabu hita tu pangunjunan (1: 12-14). I do hataNa atik pe sialoon do sibolis, jala sipajonohon do diri tu Debata (4: 7-8).  Nda sada paradigm change i, hataNa na mandok na martua do na manaon di pangunjunan?

Napaduahon, maralo tu hasomalan ni jolma na marnida donganna jolma marguru tu kondisi dohot status sosial ni sasahalak - isara  molo antar mora ibana dumenggan do panabian tusi sian panabian tu na pogos – ia pangajarion ni Debata di surat Jakobus mandok na so jadi hita marnida bohi maradophon donganta jolma (2:1, 2-10). Nda sada paradigm change non i di hita nuaeng di Indonesia on na lam segregasionalis, marnida jolma tu latarbelakang ni sasahalak, na naung sanga tatinggalhon, naung mangondolhon hinauli ni bhinneka tunggal ika, songn i parheheha pola lam togu marhembang diskriminasi politis di 9 propinsi, songon na nidapot ni peneliti LIPI: “Molo ndang saugamo dohot hita ndang sipilliton nasada an.”

Napatoluhon, somalna mansai lomo do roha ni jolma manghatai jala tarrimas siala ni bahat sibonsiri, termasuk ala ni stress binahen ni tuntutan ni ngolu.  Bahat do mara na ro tu angka na so mangarajai dilana. Maralo tusi hatani Debata mandok dumenggan do di ngoluon angka na girgir manangihon, bangkol manghatai dohot bangkol tarrimas (1: 19, patudos Parjamita 7: 9). Domu tusi do hata bisuk manjagahon dilanta on: Dirante ma dilana (1: 26).

Di partingkian digital nuaeng, ndang holan semboyan  na mangihut on na dipangke paingothon angka na so boi mangorom pamanganna, “Pamanganmu do babiatmu,” alai dohot do semboyan on tu angka na so mangorom jarijarina di partingkian digital na digohi barita hoax, “Jarijarim do babiatmu”, ai boi do gabe tu hurungan dongan molo mangalanggar UU Teknologi Informasi.

Paopathon, tu angka na porsea na humurang patupa pambahenan na denggan di ngolu, diondolhon hata ni Debata do taringot tu hinaringkot ni haporseaon na marpangulaon (2: 17). Siala ni i do diajarhon dua na mangihut on taringot tu ngolu na marhadaulaton. “Ia hadaulaton na ias jala na so marlindang di roha ni Debata i ma mandulo angka na so marama na so marina nang na mabalu di haporsuhonnasida” huhut “mangaramoti diri maralohon portibion” (1: 27).  Pinsang-pinsang do i tu angka ruas ni huria protestan na so manggohi ngoluna dohot ulaon na denggan dalanna mandok mauliate tu Debata na patigor ibana marhite basabasa haporseaon di silang ni Jesus Kristus na manobus angka dosanta.

Napalimahon, tu angka na ganggu martangiang diajarhon do na molo martangiang sasahalak  ingkon di bagasan haporseaon do (1:6), ai margogo situtu do tangiang ni partigor (5:16). Pinsangpinsang do i tu angka na so togu be haporseaonna di gogo ni tangiang dohot di tangiang pinargogoihon ni Tondi i.

Udut ni na palimahon i do hataNa di Yak 4: 13-17 i. Mansai ampit do hataNa i tu hita nuaeng na lam marnida hagogoon ni hajolmaon di Era Revolusi Industri Napaopathon.  Di partingkianta nuaeng nunga gabe hasintongan hata bisuk na mandok hinaringkot ni perencanaan jauh-jauh hari. Digoari angka na so marbisuk do haotoon molo mangula marnida di lapik. Ndang adong pangaradeion. Ndang adong perencanaan na denggan. Ndang jadi ndang adong sada perencanaan na denggan taringot tu aha sidungdungon, dia sipatupaon mandungdung sidungdungon i,  jala songon dia ma dalan  (Jaha: strategi) mandungdungsa. Angka dalan manang strategi na ampit pe nunga ingkon sipastihonon, atik pe ingkon adong do haradeon paampithon strategy na imbarui tu kondisi na imbaru na tubu di pardalanan ni tingki.

Na tangkas hata bisuk on do dihaporseai jala dipatupa hita jolma nuaeng on: “Molo denggan diparade ho saluhut laho mandungdung sidungdungonmi, ba nunga boi botoonmu hasil na denggan.”  Lobi sian i dope tahe, di tingkinta nuaeng nunga lam margurasa pandapot na mandok songon on: “Tarbahen jolma i sandiri do mandungdung sidungdungonna, mangadopi siadopanna, mangatasi angka hamaolon di ngolu ni jolma i marhite hinatimbo ni angka parbinotoan na marragam i, so pola  ingkon manungkun manang na dihalomohon Debata i manang ndang, so pola ingkon mangido pangurupion manang lam ma marsigantung tu huaso di duru ni diri ni jolma i, i ma huaso pangurupion ni Debata. Ndang taharingkothon be campur tangan ni Debata, atik pe adong do Debata. Hajagoon ni jolma boi mangatur.

Di partingkian ni panurat surat Jakobus nunga tubu tong pamingkirion na songon i. I do na andar di Jakobus 4: 13: “Sadari on manang marsogot laho ma hami tu huta adui, asa disi hami sataon martigatiga jala mangomoomo.” Jolma i manangkapi aha siulaonna, dia sidungdungonna, jala songon dia manghalashon naung nidungdungna i. Ndang adong disi huaso nang pangurupion ni Debata. Laos ndang ringkot paampiton sidungdungon i tu sangkap ni Debata di hajolmaon. Ganup ma manangkapi saurdot tu sangkap manang sintasintana sandiri. I ma pamingkirion nialo ni hata ni Debata. Dipauba ma pamingkirion si songon i tu pamingkirion dohot parange haporseaon na sintong, na imbaru, i ma na tarsurat di ayat 15:

“Singkat ni i ma nian dohononmuna: ‘Molo na lomo roha ni Tuhan i, mangolu ma hami, jala bahenonnami ma on dohot an’” (4: 15).

Adong dua na hinangkam ni nayat 15 on.

Naparjolo, mandok na ganup manangkapi sada siulaon, ganup mamingkiri dalan na ampit mandungdungsa (Indonesia: strategi), dohot ganup manangkapi dia sidungdungon, laos ganup mamingkirhon songon dia manghalashon naung tartundung sidungdungon i,  ingkon parjolo situtu do pastihononta na saurdot do angka i tu lomo ni roha ni Tuhan i. Ndang jadi lomolomonta manangkapi  siulaon ni ngolu ni angka anak ni Tuhan i. Ndang be sangkapsangkapta sandiri sipatupaonta. Ingkon sangkap ni Debata do. I do imbarta sian sangkap ni na so sioloi Debata Sitolusada naung manobus hita i. Molo saurdot tu lomo ni roha ni Debata, dipatupa ma i sadenggandengganna. Molo nunga saurdot i tu lomo ni roha ni Debata ndang jadi ganggu be rohanta mangulahon i dohot mandungdung i. Unang alang rohanta mangulahon i.  Marhitehite goar ni Tuhan Jesus ma nasa na taula, di hata nang pambahenan, sian nasa roha songon na tu Tuhan i, ndang songon na tu jolma (Kolosse 3: 17, 23). Unang ala ndang marsitutu hita mangulahonsa sadenggandengganna gabe Debata tasalahon uju ndang saut tardungdung sidungdungon i. Jala molo nunga tardungdung sidungdungon i, unang ganggu rohanta manghalashon i. Dalan mananda lomo ni roha ni  Debata na uli dohot na sun denggan di ganup partingkian dohot inganan i ma marhite na manguba dohot paimbaruhon pingkiranta (Rom12:2). Ndang otomatis i masa. Mansai ringkot do manangiangkonsa asa digohi pantas ni roha hita mananda lomo ni roha ni Debata, ai ihut tusi do tarbahen hita marparangehon na tama di Tuhan i, marparbuehon nasa ulaon na denggan  (Ida Kolosse 1: 9-10).

Mansai ringkot do hita halak Kristen Batak di taon 2019 on, di na mamonai sude na tasangkapi di ngolunta di ariari na ro  manungkunhon sungkunsungkun on: Nunga saurdot on tu lomo ni roha ni Debata, jala nunga taida di mata ni partondionta na dihalomohon Debata do na tasangkapi on? Dison do mansai porlu ngolu partangianganta, ngolu meditasinta i. Molo ndang dope, ba unang tapatupa i. Talului ma na saurdot tu lomo ni rohaNa. Alai molo nunga saurdot be tu lomoNa, ba tapangido ma gogo sian Ibana patupahon i. Tapangido ma pandonganionNa. Tapangido ma bisuk sian Ibana. Tapangido ma pangurupionNa. Sai na lehononna do i molo tapangido di bagasan haporseaon.

Mansai ringkot do on ndang holan di angka sundut na omposo na manontuhon dia ma siparsiajaranna dung tamat SMP, SMA di bulan 4 na ro, dung sidung Kuliah, manang uju mangalului karejo na parjolo manang karejo na paduahon manang patoluhon manang paopathon, alai mansai ringkot do i nang di angka sundut na tumua, angka pegawai nang uluan, angka sijalo ulaon nang silehon ulaon, angka partani, partigatiga, pardengke, parpinahan, pengusaha, pamarenta, sijaga keamanan ni rakyat, sipatupa dohot sipanjongjong uhum, na mangula di negara dohot di swasta, na mangula di duru ni jabu dohot di bagasan jabu. Sude ma tahe.

Napaduahon, di na manangkapi siulaonta di bagasan taon on dohot di pardalanan ni ngolunta, taingot ma na sai rade do Tuhanta pardenggan basa i jouonta parsidohot manumpahi dohot pasauthon na tasangkapi i. Songon hata ni Buku Endenta No 66:1 i, “Debata Baen Donganmi, laho mangula ulaonmu, baen Ibana haposanmu, sai paserep rohami. Debata baen donganmi, Debata baen donganmi.” Unang baliksa, tapangasahon hagogoonta, hapistaranta. Ai ia hita jolma on, tung beha pe timbo ni hapistaranta, sai adong do angka na boi dohonon di duru ni hatauonta. Jala di bagasan hatauonta i sai adong do nang disi hagaleonta. Mansai ringkot do hita manjou, mangaloas Debatanta Sitolusada i mandongani hita. Lam timbo parbinotoanta dohot hatauon hajolmaonta, lam timbo do pangunjunan na ro tu hita ndang manjou Debata di ngolunta. Siala ni i, andorang so mamonai, di na mamonai dohot di na patupa jala dung mangujungi ulaon mangulahon ulaonta i tongtong ma tapangido jala taelekhon marhite tangiangta pandonganionNa pasauthon sude (Epesus 6:  18).

Na dua na di ginjang i ma hamubaon pangantusion partondion nang parange di hita di minggu Epiphanias on, i ma pangantusion na meret sian na mandok boi do lomolomonta angka na porsea i manangkapi na tasangkapi tu pangantusion dohot pamabahenan na mandok na ingkon tasulingkiti do di ulaonta nang di sidungdungonta manang na naung dihalomohon Debata, manang naung saurdot dohot lomo ni roha ni Debata angka sangkap ni ngolunta i. Angka sangkapta tu dirinta dohot angka sangkapta tu donganta jolma ingkon do jolo tasungkunhon sungkunsungkun on: Nunga dihalomohon Debata i manang ndang? Nunga saurdot i tu lomoNa manang ndang dope? Lomo ni roha ni Debata do suhatsuhatta. Laos tatulak ma pangantusion na mandok na tarbahen hita do mandungdung sadenggandengganna na taparsinta dohot na tasangkapi i di ngoluon mangasahon hapistaran dohot hatauon hajolmaonta. Baliksa sai tajou ma Debata tu ulaon nang sidungdungonta i asa Ibana na dohot patauhon hita mandungdungsa.

I ma na denggan. Molo ndang taula na denggan na taboto i di ngolunta, hata ni Tuhanta mandok mardosa do manang ise na umboto na denggan alai ndang mangulahonsa (Jakobus  4: 17).

Dipasupasu Tuhanta ma hita ganup manangkapi ganup sintasinta saurdot tu lomo ni roha ni Tuhanta, jala tajou ma Ibana tongtong patauhon hita mandungdung angka sangkapta na saurdot tu lomo ni rohaNa tu dirinta nang tu hajolmaon. Amen.

Pdt Dr. Robinson Butarbutar

Sian Parsameanta, STT-HKBP

HP: 0812-62472015.

https://hariansib.com/Agama-Kristen/Detik-detik-Kasih-Karunia-Natal

https://hariansib.com/Agama-Kristen/Nasehat-Hidup-di-Tengah-tengah-Keberagaman

https://hariansib.com/Agama-Kristen/KRP-HKBP-Pdt-Dr-Robinson-Butarbutar-Ajak-Pendeta-Bantu-Sesama-Pelayanan

https://hariansib.com/Agama-Kristen/Melangkah-dengan-Nyanyian-Baru

https://hariansib.com/Agama-Kristen/Tidak-Sekedar-Takjub

https://hariansib.com/Agama-Kristen/Media-Harus-Menyuarakan-Kabar-Baik

KISI KISI ETIKA KRISTEN

Kisi Kisi Etika Kristen

Mata Ujian                 ETIKA KRISTEN

Prodi                           : Pend. Matematika,PPKn,Fisika

Dosen Pengasuh        : Pdt.Sunggul Pasaribu,STh,M.PdK

Soal-soal.

1.      Untuk memudahkan makna, hakekat dan tujuan suatu pengetahuan maka diperlukan penelusuran arti secara mendalam. Oleh karena itu sangat perlu memulainya dengan mencari akar kata. Maka jelaskanlah etimologi dan pengertian Etika menurut pandangan beberapa agama yang dianut manusia.

2.      Bolehkah disamakan etika dengan adat atau budaya lokal? Kalu sama dalam hal mana, jika tidak sama, apa pula perbedaan anatar etika dengan adat, budaya.? Jelaskan.

3.      Dalam Etika sebagai kewajiban dibagi menjadi dua sifat, yaitu : 1).Imperatif Hipotesis. 2). Imperatif Kategoris. Jelaskan kedua hal dimaksud.

4.      Ada kebaikan yang harus dilakukan meski tidak sesuai dengan hati nurani kita. Tetapi, ada juga kebaikan yang harus ditolak meski menurut hati nurani kita hal penting dilakukan. Jelaskan alasan mengapa boleh dilakukan atau lebih baik jangan dilakukan meski itu baik (etis).

5.      Etika sebagai ajaran moral merupakan suatu filsafat yang merefleksikan ajaran moral memiliki 5 (lima) ciri khusus. Sebutkan.!

6.      Sebut dan jelaskan perbedaan antara etika dengan moral.

7.      Sedikitnya ada 4 (empat) alasan mengapa etika itu diperlukan manusia. Sebut dan jelaskan.

8.      Bagaimanakah menurut saudara tentang pendapat yang mengatakan, baik menurut saya tetapi belum tentu baik menurut orang lain – Sebaliknya, baik menurut orang lain tetapi menurut saya belum tentu baik untuk dilakukan. Jelaskan dengan singkat.

9.      Sebut dan jelaskan etika menurut Perjanjian Lama.

10.  Berikan contoh tentang etika yang tidak sesuai dengan ajaran perjanjian baru.

11.  Dimanakah letak perbedaan antara Moral, Norma dengan Etika? Jelaskan

12.  Sebut dan jelaskan perbedaan antara etiket dengan etika. Berikan beberapa contoh dalam kehidupan sehari-hari.

13.  Jelaskan peranan etika dalam melengkapi kehidupan beragama

14.  Dalam setiap mengambil keputusan etis yang bertanggungjawab, ada faktor yang mempengaruhi dan wajib menjadi pertimbangan, yaitu ; pertimbangan berdasarkan Spiritual Quatation, Inteligence Quatation dan Emosional Quatation. Jelaskan maksudnya.

15.  Pertimbangan apakah yang dominan kita lakukan dalam mengambil keputusan yang terbaik. Jelaskan menurut keyakinan (Agamamu) dan menurut Sosial, Budaya.

16.  Bagaimanakah kedudukan etika dalam masyarakat yang masih kuat memeluk adat-istiadat atau budaya. Jelaskan.

KISI KISI PAK REMAJA

Mata Ujian                 PAK REMAJA

                                    Prodi                           : Pendidikan Agama Kristen

                                    Dosen Pengasuh        : Pdt.Sunggul Pasaribu,STh,M.PdK

Soal-soal.

1.      Pada masa pengenalan Remaja (Seperti, Masa Awal, Masa tengah, Masa Akhir Remaja) caranya kita perlu mengetahui beberapa ciri-cirinya. Sebutkan dan jelaskan ciri-ciri yang bagaimanakah pada setiap masa remaja tersebut.

2.      Sebutkan dan jelaskan bagaimana pendidikan agama bagi remaja dalam Alkitab yang kamu ketahui

3.      Ada dua istilah yang populer dalam perkembangan masa remaja , yaitu : Pubertas dan Adolecense. Jelaskan kedua arti kata tersebut untuk menggambarkan masa perkembangan remaja.

4.      Sebutkan beberapa ciri pubertas seorang remaja baik secara fisik maupun secara kejiwaan.

5.      Dalam pengertian umum, seks adalah anugerah Tuhan untuk dijaga keutuhannya. Namun ada disebut Seks Primer dan Seks Sekunder dalam dunia remaja. Jelaskan kedua pengertian tersebut.

6.      Bagaimanakah pandangan Alkitab (Kristen) tetang masalah seksualitas. Jelaskan dengan singkat.

7.      Paparkanlah masalah yang dihadapi oleh seorang remaja di rumah, di sekolah, dan di masyarakat. Sebutkan juga faktor yang mempengaruhi sehingga masalah tersebut terjadi.

8.      Masalah apakah yang menonjol bagi seorang remaja jika dihubungkan dengan pengaruh negative perkembangan tehnologi informasi dewasa ini. Jelaskan

9.      Untuk memahami perkembangan kepribadian seorang remaja, kita perlu mengenal teori perkembangan yang disebut dengan Identifikasi dan Eksperimentasi.  Jelaskan pengertian kedua istilah ini.

10. Apakah gunanya kita mempelajari ilmu psikologi untuk mengetahui perilaku seorang remaja. Jelaskan.

11. Paparkanlah dengan singkat bagaimanakah kepribadian dan sikap Yesus ketika orangtua-Nya mencarinya sementara Yesus sendiri sedang serius mengajar di Synagoge.

12. Apakah kurikulum pendidikan yang dilakukan gereja untuk membina remaja. Sebut dan jelaskan.

13. Buatlah bentuk-bentuk program Pendidikan Agama Kristen (PAK) kepada remaja untuk memelihara pertumbuhan iman dan kepribadian seorang remaja.

14. Bagaimanakah penanganan pemerintah untuk menanggulangi masalah remaja dewasa ini. Sebut dan jelaskan.

Selamat Ujian

Kisi Kisi PAK dan Masyarakat Majemuk

PAK DAN MASYARAKAT MAJEMUK

                                    Prodi                           : Pendidikan Agama Kristen

                                    Dosen Pengasuh        : Pdt.Sunggul Pasaribu,STh,M.Pd.K

Pertanyaan

1. Apakah pengertian umum dari Pluralisme
2. Kita perlu memahami Pluralisme di tengah kepelbagaian agama, sosial, dan pandangan politik agar tercipta kerukunan, keharmonisan, kedamaian, hubungan yang baik antar sesame pemeluk agama dan antar sesama umat bergama. Mengapa perlu? Jelaskan alasannya.
3. Apakah maksudnya pemahaman kita terhadap Pluralisme secara,:

a)      Anthropologis

b)     Religius

c)      Theologis

4. Kita menyadari bahwa agama mengajarkan monoteisme, sementara dalam realitas hidup kita menghadapi kepelbagaian keyakinan yang berbeda namun dengan tujuan (objek) yang sama, yaitu; TUHAN. Oleh karena itu, apakah yang diajarkan dalam Pluralisme agama tersebut.?
5. Bagaimanakah sikap orang Kristen terhadap Pluralisme. Jelaskan.!
6. Bagaimanakah pendapat saudara dengan adanya pemahaman agama Global. Padahal saudara menganut kebenaran Kristen. Jelaskan pengertian Matius 5:13-14, untuk menghadapi keyakinan (agama) sesama manusia.
7. Setelah abad Reformasi (masa pencerahan), maka Pluralisme menghadapi Theologia Liberal, sehingga filsafat Ilmu dan Teologia kekinian sangat mempengaruhi Pluralisme. Oleh karena itu,apakah pendekatan yang dilakukan Ernst Troeltsch (1865-1923) tentang konsep Teologia Pluralisme. Sebut dan jelaskan.!
8. Perkembangan Pluralisme modern sangat dipengaruhi oleh dunia filsafat,yaitu,;

a.       Filsafat Relativisme

b.      Filsafat Pragmatisme

c.       Filsafat Eksistensialisme

Jelaskan ketiga aliran filsafat tersebut.?

9. Apakah sisi positif dan dampak negatif terhadap PAK dalam mempelajari dan mengimplementasikan Pluralisme.?  Jelaskan,!

 Selamat Ujian